November 3, 2026
ශ්‍රී ලංකාව සහ යුරෝපා සංගමය අතර තිරසාර වෙළෙඳ සබඳතා ශක්තිමත් කිරීම අරමුණු කරගත් වසර හතරක ව්‍යාපෘතියකට ආධාර කිරීමට යුරෝපා සංගමය එකඟ වී ඇති බව රජය නිවේදනය කර ඇත.
මෙම ව්‍යාපෘතිය හරහා හරිත සංක්‍රාන්ති ක්‍රියාමාර්ග සහ දේශගුණික විපර්යාසවලට ඔරොත්තු දෙන වෙළෙඳ භාවිතයන් ප්‍රවර්ධනය කිරීම මෙන්ම, ශ්‍රී ලංකාවේ වෙළෙඳ කටයුතු සම්බන්ධ ආයතනික ධාරිතාව වර්ධනය කිරීම කෙරෙහි අවධානය යොමු කෙරෙනු ඇත.
එමෙන්ම, යුරෝපා සංගම් වෙළෙඳපොළට ප්‍රවේශ වීම සඳහා අවශ්‍ය අන්තර්ජාතික ප්‍රමිතීන්ට අනුකූල වීමට රට දරන උත්සාහයට ද එය සහාය වනු ඇත.
වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍යාංශය විසින් මෙම ව්‍යාපෘතිය වසර හතරක කාලයක් තුළ ක්‍රියාත්මක කිරීමට නියමිතය.
ව්‍යාපෘතිය ක්‍රියාත්මක කිරීම සඳහා යුරෝපා සංගමය සහ ශ්‍රී ලංකා රජය අතර මූල්‍ය ප්‍රදාන ගිවිසුමකට අත්සන් තැබීම පිණිස මුදල්, සැලසුම් සහ ආර්ථික සංවර්ධන අමාත්‍යවරයා ලෙස ජනාධිපති අනුර කුමාර දිසානායක ඉදිරිපත් කළ යෝජනාවට කැබිනට් මණ්ඩලය අනුමැතිය ලබා දී තිබේ.
