වයස අවුරුදු 18ට වැඩි මෙරට සියලුම පුරවැසියන් සඳහා බදු ගෙවන්නා හඳුනාගැනීමේ අංකයක් (TIN) ලබා ගැනීම සඳහා මෑතකදී හඳුන්වා දුන් ක්‍රමයට මුදල් අමාත්‍යංශය විසින් සංශෝධන මාලාවක් හඳුන්වා දීමට නියමිත බව වාර්තා වේ.

මෙම ක්‍රමය ක්‍රියාත්මක කිරීමේ ප්‍රායෝගික දුෂ්කරතා සම්බන්ධයෙන් දේශීය ආදායම් දෙපාර්තමේන්තුවේ නිලධාරීන්ගේ පැමිණිලිවලට අනුව මෙම පියවර ගෙන ඇත.

මෙම ක්‍රමයේ වෙනස්කම් හඳුන්වාදෙන තුරු එම ක්‍රමය දැඩිව ක්‍රියාත්මක නොකරන බව මුදල් රාජ්‍ය ඇමැති රංජිත් සියඹලාපිටිය ප්‍රකාශ කර තිබේ.

මෙම ක්‍රමය හඳුන්වාදීමට රුපියල් බිලියන 2.5ක පමණ මුදලක් අවශ්‍ය වනු ඇති බවත්, එම TIN අංකය හිමිකරුට නිල වශයෙන් තැපැල් මගින් දැනුම්දීමට දේශීය ආදායම් දෙපාර්තමේන්තුවට අවශ්‍ය වූ බවත් ඔහු පැවසීය.

එය ක්‍රියාත්මක කිරීමට අවශ්‍ය මානව සම්පත තමන්ට නොමැති බව එම නිලධාරීන් පෙන්වා දී තිබේ.

මෙම ක්‍රියාවලිය සම්පූර්ණ කිරීම සඳහා දිනකට රුපියල් 1500ක දීමනාවක් සමඟින් උපාධි අපේක්ෂකයන් තාවකාලික පදනමින් බඳවා ගැනීමට බලාපොරොත්තු වන අතර ජ්‍යෙෂ්ඨ නිලධාරීන් සහ කාර්යාල කාර්ය සහායකයන් පවා තාවකාලික පදනමින් බඳවා ගන්නා බව රාජ්‍ය ඇමැතිවරයා පැවසීය.

ඇමැති සියඹලාපිටිය කියා සිටියේ මෙම ක්‍රමයේ වෙනස්කම් හඳුන්වාදීමට කැබිනට් අනුමැතිය ලබාගන්නා බවයි.

මේ අතර දේශීය ආදායම් සේවා සංගමයේ ලේකම් එච්.ඒ.එල්. උදයසිරි කියා සිටියේ මෙම ක්‍රමය අනිවාර්ය කිරීමට පෙර වසරකින් ප්‍රමාද කළ යුතු බවට ඔවුන් යෝජනා කළ බවයි.

එම ක්‍රමය ක්‍රියාත්මක කිරීම සඳහා අවශ්‍ය පහසුකම් ලබාදීමට මුදල් අමාත්‍යංශය අපොහොසත් වී ඇති බව ඔහු පැවසීය.

පවතින ක්‍රමය යටතේ TIN අංකය නිකුත්කිරීම සඳහා අනුමැතිය ලබා දීමට මට්ටම් දෙකක් ඇති බවත්, එම නිසා එම ක්‍රියාවලිය ප්‍රමාද වන බවත් ඔහු පැවසීය.

එම අංකයට ද්විත්ව අනුමැතිය අවශ්‍ය බැවින් දැනට සිටින කාර්ය මණ්ඩලය ප්‍රමාණවත් නොවන බවත් ඔහු පැවසීය.

පුද්ගලයන් ලියාපදිංචි කිරීමේ දෙපාර්තමේන්තුවේ, මෝටර් රථ ප්‍රවාහන දෙපාර්තමේන්තුවේ සහ බැංකුවල දත්ත සමුදායන් සමඟ මෙම පද්ධතිය සම්බන්ධ කළ යුතු බව ද ඔහු පැවසීය.