ශ්‍රී ලංකා සිවිල් ගුවන් සේවා අධිකාරියේ අධ්‍යක්ෂ ජෙනරාල් ලෙස කටයුතු කරන දමින්ද රඹුක්වැල්ල, ශ්‍රී ලංකන් ගුවන් සේවයේ කනිෂ්ඨ පළමු නිලධාරියකු ලෙස සේවය කරමින් සිටියදී ලබාගත් Airbus A320 වර්ගයේ ගුවන්යානා සඳහා වන වර්ගීකරණ සුදුසුකම සම්බන්ධයෙන් විශ්‍රාමික ගුවන්යානා ඉංජිනේරු දිනේෂ් ද අල්විස් විසින් මධ්‍යම අපරාධ පරීක්ෂණ කාර්යාංශය (CCIB) වෙත පැමිණිල්ලක් ඉදිරිපත් කර ඇත.

මෙම පැමිණිල්ල ඉදිරිපත් කර ඇත්තේ 2022 වසරේදී දමින්ද රඹුක්වැල්ල මුහුණ දුන් පියාසර සිමියුලේටර් පුහුණුවීම් සහ ඇගයීම්වලට අදාළවය.

එහි දැක්වෙන චෝදනාවලට අනුව, ඔහු FFS 4, FFS 7, FFS 8 සහ FFS 9 ලෙස හඳුනාගත් සිමියුලේටර් ඇගයීම් කිහිපයකින් අසමත් වී ඇති අතර, අදාළ ගුවන්යානා බලපත්‍ර අනුමැතිය ලබාගැනීමට අවශ්‍ය සුදුසුකම් ඔහු සතුව තිබුණේද යන්න පිළිබඳව ඉන් ප්‍රශ්න මතු කර තිබේ.

කනිෂ්ඨ පළමු නිලධාරියකු ලෙස ජාතික ගුවන් සේවයට බඳවාගෙන සිටි රඹුක්වැල්ලට, අදාළ වර්ගීකරණ පුහුණු උපදේශකවරයා විසින් එක් සිමියුලේටර් පුහුණු අභ්‍යාසයක් සඳහා ‘දෙවැනි ශ්‍රේණියේ’ ඇගයීමක් ලබා දී තිබූ බව වාර්තා වේ.

එලෙස ඇගයීම්වලින් අසමත් වී තිබියදීත්, රඹුක්වැල්ලට ශ්‍රී ලංකන් ගුවන් සේවය තුළ තම පුහුණුවීම් තවදුරටත් කරගෙන යාමට ඉඩ දී ඇති බවට චෝදනා එල්ල වේ. අදාළ ක්‍රියාපටිපාටිය සම්බන්ධයෙන් මතු වූ ගැටලුකාරී තත්ත්වයන් හේතුවෙන් උපදේශකවරුන් කිහිපදෙනකුම ඔහුට පසුව පුහුණුව ලබාදීම ප්‍රතික්ෂේප කර ඇති අතර, පසුව ඔවුන් එම තනතුරුවලින් ඉල්ලා අස්වී ඇත.

එසේම, සිදු වූ බව කියන නීති විරෝධී අතපෙවීම්වලට විරෝධය පළ කරමින්, ප්‍රධාන පියාසර පුහුණු සහ ප්‍රමිතීන් භාර නියමුවා ඇතුළු ජ්‍යෙෂ්ඨ පුහුණු නියමුවරුන් 7 දෙනකු 2024 වසරේදී ශ්‍රී ලංකන් ගුවන් සේවයේ නියමු පුහුණු සහ ප්‍රමිතීන් පිළිබඳ කාරක සභාවේ අධීක්ෂණ තනතුරුවලින් ඉල්ලා අස්වූහ.

එවකට සිවිල් ගුවන් සේවා අධ්‍යක්ෂ ජෙනරාල්වරයාව සිටි පී ඒ ජයකාන්ත, අදාළ පුහුණුවන්නාගේ අසමත්වීම් නොසලකා හරිමින්, සිවිල් ගුවන් සේවා අධිකාරිය විසින් නිකුත් කරන ලද පුහුණු සහ ප්‍රමිතීන් පිළිබඳ අනුමැතීන්ට පටහැනිව, එයාර්බස් A320 සිමියුලේටර් පුහුණුව තවදුරටත් කරගෙන යාමට ඔහුට මැදිහත් වී අවස්ථාව ලබා දුන් බවට එම නියමුවෝ චෝදනා කළහ.

මෙම පුහුණු ක්‍රියාවලිය සම්බන්ධයෙන් කණස්සල්ල පළ කළ අදාළ උපදේශකවරුන්, ඉදිරිපත් වූ පැමිණිල්ලෙන් අනතුරුව මධ්‍යම අපරාධ විමර්ශන කාර්යාංශය වෙත ප්‍රකාශ ලබා දී ඇති බවද වාර්තා වේ.

(The Sunday Morning)