December 30, 2025
ජංගම දුරකථන යෙදුම් භාවිතයෙන් සේවා සපයන කුලී රථ රියදුරන් ඔවුන් මුහුණ දෙන අසාධාරණකම් සම්බන්ධයෙන් ශ්රී ලංකා මානව හිමිකම් කොමිසමට පැමිණිල්ලක් ගොනුකර තිබේ.
ඇල්ල ප්රදේශයේ දී මෑතකදී වූ සිදුවීමක් මත මෙම පැමිණිල්ල ඉදිරිපත් කර ඇත.
එම ප්රදේශයේ ක්රියාත්මක වන සෙසු ත්රිරෝද රථ රියදුරන් ජංගම දුරකථන යෙදුම් භාවිතයෙන් සේවා සපයන එක් රියදුරකුට තර්ජනය කළ බවට චෝදනා එල්ල වී තිබේ.
ත්රිරෝද රථ කර්මාන්තය රට පුරා දහස් ගණනකට රැකියා අවස්ථා නිර්මාණය කර ඇතත්, කුලී රථ රියදුරන් අතර මත ගැටුම් ගණනාවක් පසුගිය සතිවලදී වාර්තා විය.
යෙදුම් පාදක කුලී රථ සේවා ක්රියාත්මක කරන රියදුරන්ට තර්ජනය කිරීම, බිය ගැන්වීම සහ පහරදීම වැනි නීති විරෝධී ක්රියාවන් සිදුකළ බවට චෝදනා එල්ල විය.
එවැනි ක්රියාවන් හේතුවෙන් රටට පැමිණෙන විදේශීය සංචාරකයන් පවා අපහසුතාවට පත් වූ අවස්ථා බොහොමයක් තිබේ.
වර්තමානයේ, දිවයිනේ ප්රදේශ කිහිපයක ත්රිරෝද රථ රියදුරෝ යෙදුම් පාදක මගී ප්රවාහන සේවාවන්ට එරෙහිව විරෝධතා පවත්වති.
මෙම සේවාවන් මගින් අයකරනු ලබන අඩු ගාස්තු ඔවුන්ගේ ජීවනෝපායන්ට තර්ජනයක් වන බව ඔවුහු පවසති.
ඒ අනුව, ඇල්ල, වැලිගම සහ සීගිරිය ඇතුළු රටේ විවිධ ප්රදේශවල ඔවුන් විරෝධතා පවත්වා ඇත.
මෙම පසුබිම යටතේ, යෙදුම් පාදක මගී ප්රවාහන සේවාවන්හි නියැලී සිටින රියදුරන් පිරිසක් ඊයේ(29) ශ්රී ලංකා මානව හිමිකම් කොමිසමට පැමිණිල්ලක් ඉදිරිපත් කර තිබිණි.
