June 14, 2026
මෙරට ක්රිකට් ව්යුහයේ සිදුවෙමින් පවතින දැවැන්ත ප්රතිසංස්කරණ මාලාවේ තවත් පියවරක් ලෙස, විශේෂඥ පිතිකරණ පුහුණුකරු ජුලියන් වුඩ් සහ ජෛව යාන්ත්රික (Biomechanics) විශේෂඥ රෙනේ ෆර්ඩිනැන්ඩස් සේවයෙන් ඉවත් කිරීමට පියවර ගෙන ඇත. මහත් ආන්දෝලනයක් මධ්යයේ පද්ධතියට එක්කර ගත් මෙම විදෙස් විශේෂඥයන් දෙදෙනාට, වසරක් සම්පූර්ණ වීමටත් පෙර මෙලෙස ඉවත් වීමට සිදුව තිබීම විශේෂත්වයකි.
එරාන් වික්රමරත්නගේ ප්රධානත්වයෙන් යුත් ‘පරිවර්තන කමිටුව’ විසින් ක්රියාත්මක කරන මෙම වෙනස්කම් හේතුවෙන්, මූලිකව මාස තුනක දැනුම්දීමේ කාලයක් ලබා දී තිබුණද, මෙම මස අවසානයේදී ඔවුන් දෙදෙනාම ශ්රී ලංකා ක්රිකට් ආයතනයෙන් සමුගැනීමට නියමිතය.
මෙම ඉවත්කිරීම් පිළිබඳව අදහස් දැක්වූ ශ්රී ලංකා ක්රිකට් ආයතනයේ ප්රධාන විධායක නිලධාරී ඈෂ්ලි ද සිල්වා මෙසේ පවසයි.
“දෙදෙනාම මෙම මස අවසානයේදී ඉවත් වනු ඇත. ජුලියන් වුඩ්ගේ ගිවිසුම සැප්තැම්බර් මාසයෙන් අවසන් වීමට නියමිතව තිබූ බැවින් එය දීර්ඝ නොකරන බව අපි ඔහුට දැනුම් දුන්නෙමු. ෆර්ඩිනැන්ඩස්ගේ ගිවිසුම ලබන වසරේ සැප්තැම්බර් දක්වා පැවතියද, ඔහුගේ විශේෂඥ දැනුම උපයෝගී කර ගැනීමට අවශ්ය ජෛව යාන්ත්රික පහසුකම් අප සතුව මෙතෙක් ස්ථාපිත කර නොමැති බැවින් ඔහුගේ සේවය අවසන් කිරීමට තීරණය කළෙමු.”
ශ්රී ලංකා පිතිකරුවන්ගේ ‘පවර් හිටින්’ දුර්වලතා මඟහරවා ගැනීම සඳහා ජුලියන් වුඩ් පසුගිය ඔක්තෝබර් මාසයේදී මෙරටට පැමිණියේය. ඔහු මීට පෙර එංගලන්තය, ඉන්දීය ප්රිමියර් ලීගයේ පන්ජාබ් කිංග්ස් සහ බංග්ලාදේශ කණ්ඩායම සමඟ ද කටයුතු කර තිබූ පළපුරුදු පුහුණුකරුවෙකි.
රෙනේ ෆර්ඩිනැන්ඩස් නවසීලන්තයේ වයිකාටෝ විශ්වවිද්යාලයේ ජෛව යාන්ත්ර විද්යාව පිළිබඳ ආචාර්ය උපාධියක් හිමි, ඉන්දීය ක්රිකට් ඇකඩමිය සහ නවසීලන්ත ක්රිකට් ආයතනය සමඟ කටයුතු කළ උසස් අධ්යාපන සුදුසුකම් ලත් විශේෂඥයෙකි. දඟපන්දු යවන්නන්ගේ දියුණුව සහ ආබාධ වැළැක්වීම සම්බන්ධයෙන් ඔහු ප්රසිද්ධියක් උසුලයි.
විද්යාව සහ දත්ත මත පදනම් වූ නවීන පුහුණු ක්රමවේද මෙරටට හඳුන්වා දීමට ගත් උත්සාහය මාස නවයක් යන්නටත් පෙර මෙලෙස වෙනස් වී ඇති බව පෙනේ. පසුගිය මාර්තු මාසයේදී ඉහළ දක්ෂතා මධ්යස්ථානය ප්රතිව්යුහගතකරණය කිරීමේදී මෙම දෙදෙනා ජාතික කණ්ඩායමෙන් ඉවත් කර උසස් පුහුණු මධ්යස්ථානය භාරයට පත් කළද, දැන් ඔවුන්ට සමස්ත පද්ධතියෙන්ම ඉවත්වීමට සිදුව ඇත.
රජයේ මැදිහත්වීමෙන් පසු ශම්මි සිල්වා ප්රමුඛ විධායක කමිටුව ඉල්ලා අස්වීමෙන් අනතුරුව, පරිවර්තන කමිටුව විසින් තේරීම් කමිටු සහ ක්රිකට් මෙහෙයුම් රැසක් වෙනස් කරමින් සිටියි. මීට පෙර ඉහළ දක්ෂතා උපදේශක ලෙස කටයුතු කළ සනත් ජයසූරිය මහතා ද එම භූමිකාවෙන් ඉවත් වීමත් සමඟ ශ්රී ලංකා ක්රිකට් පද්ධතිය මේ වන විට දැවැන්ත සංක්රාන්ති සමයක පසුවෙයි.
(The Sunday Times – Sports)
