August 25, 2025
කොළඹ හදිසි නාගරික මරණ පරීක්ෂකවරයා විසින් පරීක්ෂණ අවසන් කර මළසිරුරු මුදාහැරීමේදී සිදුවන ප්‍රමාදය සම්බන්ධයෙන් කොළඹ මහනගර සභා රැස්වීමේදී අවධානය යොමුව තිබේ.
එහිදී නගර සභා මන්ත්‍රී එම්.එස්.එම්. රම්සි ටෝනි චෝදනා කර ඇත්තේ, හදිසි මරණ පරීක්ෂක අනුත්තර රාජපක්ෂ මෘතදේහයන් මුදාහැරීම ප්‍රමාද කළ බවට තමන්ට පැමිණිලි ලැබෙන බව සහ පුද්ගලයකු මියගොස් පැය 24ක් ඇතුළත සාම්ප්‍රදායිකව අවමංගල්‍ය කටයුතු සිදුකිරීමට සිදුවන නිසා, විශේෂයෙන්ම මුස්ලිම් ප්‍රජාව අපහසුතාවට පත්ව ඇති බවයි.
නිවෙස්වල වයසට යෑම වැනි ස්වාභාවික හේතූන් මත පුද්ගලයන් මියගිය අවස්ථාවලදී පවා හදිසි මරණ පරීක්ෂකවරයාට පශ්චාත් මරණ පරීක්ෂණ සිදුකිරීමට අවශ්‍ය වූ බවද මන්ත්‍රීවරයා කියා සිටියේය.
මීට වසර 10කට 15කට පෙර කොළඹ නගරයේ එකම හදිසි මරණ පරීක්ෂකවරයා වූ එඩ්වඩ් අහංගම මධ්‍යම රාත්‍රියෙන් පසුවත් හදිසි මරණ පරීක්ෂකවරයෙකුගේ රාජකාරිය ඉටුකරමින් මුස්ලිම් ප්‍රජාවගේ පිළිවෙත්වලට ගරුකළ බව මන්ත්‍රී රම්සි ටෝනි එහිදී පවසා ඇත.
සතියේ දිනවල හදිසි මරණ සම්බන්ධයෙන් සොයාබැලූ හදිසි මරණ පරීක්ෂකවරුන් වන අෂ්රොෆ් රූමි සහ ඉරේෂා දේශානි සමරවීර තම රාජකාරිය නිසි වේලාවට සිදුකර සිරුරු නිදහස් කළ බවද මෙහිදී සඳහන් කර ඇත.
කෙසේවෙතත්, සති අන්තයේ රාජකාරි සිදුකරන හදිසි මරණ පරීක්ෂකවරයා මෘතදේහ නිදහස් කිරීම නැවත නැවතත් ප්‍රමාද කරන බවට නගර සභා සාමාජිකයන්ට පැමිණිලි ලැබුණු බව ද ඔහු පවසා තිබේ.
එබැවින් අධිකරණ අමාත්‍යවරයා ලවා හදිසි මරණ පරීක්ෂකවරයාට එරෙහිව පරීක්ෂණයක් පවත්වා අදාළ ක්‍රියාමාර්ග ගතයුතු බවට ද එහිදී යෝජනාවක් ඉදිරිපත්ව ඇත.
නාගරික මන්ත්‍රී හුසේන් ජූසාර් එහිදී සභාවට පවසා ඇත්තේ, මරණ පරීක්ෂණයක් පැවැත්වීම අවශ්‍ය වන්නේ වෛද්‍යවරයකුට මරණයට හේතුව ප්‍රකාශ කිරීමට නොහැකි වූ විට පමණක් බවයි.
