සූරියවැව, වැවේගම ප්‍රදේශයේ විශේෂ කාර්ය සාධක බළකායේ (STF) මෙහෙයුමකදී මියගිය ‘ආමි අසංක’ නම් පුද්ගලයා පාතාල සබඳතා ඇති කොන්ත්‍රාත් ඝාතකයකු බව පොලිස් පරීක්ෂණවලින් හෙළි වී තිබේ.

පාතාල අපරාධකරුවන් පිරිසක් වැවේගම ප්‍රදේශයේ සැඟවී සිටින බවට ලැබුණු තොරතුරක් මත ඊයේ (22) අලුයම විශේෂ කාර්ය සාධක බළකාය මෙම වැටලීම සිදුකර තිබිණි.

මෙහෙයුම අතරතුර, සැකකරුවන් දෙදෙනෙකු බෝර 12 තුවක්කුවකින් විශේෂ කාර්ය සාධක බළකායේ නිලධාරීන්ට වෙඩි තබා තිබේ.

විශේෂ කාර්ය සාධක බළකා නිලධාරීන් ද පෙරලා ආපසු වෙඩි තැබූ අතර, එහිදී එක් සැකකරුවකුට තුවාල සිදු විය.

අනෙක් පුද්ගලයා පැන යෑමට සමත්ව තිබිණි.

ප්‍රහාරයෙන් විශේෂ කාර්ය සාධක බළකායේ නිලධාරියෙකු ද තුවාල ලැබීය.

තුවාල ලැබූ සැකකරු සහ විශේෂ කාර්ය සාධක බළකායේ නිලධාරියා සූරියවැව රෝහලට ඇතුළත් කරන ලද අතර එහිදී ‘ආමි අසංක’ මිය ගියේය.

පරීක්ෂණවලින් හෙළි වූයේ අසංක සේවයෙන් ඉවත් වීමට පෙර හමුදාවේ සේවය කර ඇති බවයි.

විශේෂ කාර්ය සාධක බළකායේ අණදෙන නිලධාරී නියෝජ්‍ය පොලිස්පති සමන් සිල්වාගේ අධීක්ෂණය යටතේ පරීක්ෂණ සිදු කෙරෙමින් පවතී.