හිටපු ජනාධිපති රනිල් වික්‍රමසිංහට චෝදනා එල්ල වන බ්‍රිතාන්‍ය සංචාරය නිල සංචාරයක් නොව පෞද්ගලික සංචාරයක් බව ඉදිරිපත් කරන ලද කරුණුවලින් පෙනීයන බව කොටුව මහේස්ත්‍රාත්වරිය ඊයේ සිය නියෝගය ලබාදෙමින් ප්‍රකාශ කර තිබිණි.

හිටපු ජනාධිපතිවරයා විසින් අපරාධ පරීක්ෂණ දෙපාර්තමේන්තුවට ඊයේ ඉදිරිපත් කළ ලේඛන සවිස්තරාත්මකව පරීක්ෂා කළ යුතු බව ඇය තවදුරටත් සඳහන් කළාය.

ඒ අනුව, ඉදිරිපත් කළ කරුණු මත පදනම්ව, තහවුරු වී තිබුණේ ඔහුගේ සංචාරයට හේතුව නිල ආරාධනයක් නොවන බවයි.

සංචාරය පෞද්ගලික ලෙස සළකනු ලබන බැවින්, එය පොදු දේපළ පනතේ විධිවිධාන යටතට ගැනේ.

1982 අංක 12 දරන පොදු දේපළ (විශේෂ විධිවිධාන) පනතේ 8(1) වගන්තිය යටතේ සැකකරු රක්ෂිත බන්ධනාගාරගත කරන ලදී.

සැකකරුගේ සෞඛ්‍ය තත්ත්වය ස්ථාවර බව ද අධිකරණය නිරීක්ෂණය කළේය.

ඔහුගේ සෞඛ්‍ය තත්ත්වය පිළිබඳ වෛද්‍ය වාර්තාවක් ඊයේ අධිකරණයට ඉදිරිපත් කර නොතිබිණි.

සැකකරුගේ සෞඛ්‍ය තත්ත්වය තහවුරු කිරීම සඳහා සුදුසු වෛද්‍ය ලියකියවිලි ඊළඟ නඩු දිනයේදී ඉදිරිපත් කරන ලෙස මහේස්ත්‍රාත්වරිය නියෝග කළාය.

ඊට අමතරව, අටවැනි විධායක ජනාධිපතිවරයා ලෙස කටයුතු කළ කාලයේ ගත් ක්‍රියාමාර්ග සම්බන්ධයෙන් සැකකරුගේ නීතිඥවරයා ඉදිරිපත් කළ තර්ක ඇප ඉල්ලීමට අදාළ නොවන බව මහේස්ත්‍රාත්වරිය පැහැදිලි කළාය.