හිටපු ජනාධිපති රනිල් වික්‍රමසිංහ ඊයේ (22) අත්අඩංගුවට ගෙන දින 14 ක් රිමාන්ඩ් කරන බවට යූ ටියුබ්කරුවකු වන සුදත්ත තිලක්සිරි තම නාලිකාවේ කළ ප්‍රකාශයක් සම්බන්ධයෙන් පරීක්ෂණයක් ඉල්ලා එක්සත් ජාතික පක්ෂය අපරාධ පරීක්ෂණ දෙපාර්තමේන්තුවට (CID) පැමිණිල්ලක් ගොනුකර තිබේ.

අගෝස්තු 21 වැනි දින සුදත්ත තිලක්සිරි තම යූ ටියුබ් නාලිකාවේ ප්‍රකාශ කර තිබුණේ හිටපු ජනාධිපතිවරයා අද අනිවාර්යයෙන්ම අත්අඩංගුවට ගෙන දින 14ක් රිමාන්ඩ් කරන බවයි.

ඒ අනුව, කිසිදු නිල ක්‍රියාමාර්ගයක් ගැනීමට පෙර එවැනි ප්‍රකාශයක් නිකුත් කිරීම සම්බන්ධයෙන් පරීක්ෂණයක් ඉල්ලා සිටිමින් එක්සත් ජාතික පක්ෂය නියෝජනය කරන නීතිඥ කණ්ඩායමක් CID වෙත පැමිණිල්ලක් ගොනුකළේය.

මේ අතර, විපක්ෂ නායක සජිත් ප්‍රේමදාස පවසන්නේ, හිටපු ජනාධිපතිවරයෙකු අත්අඩංගුවට ගැනීම සිදුවීමට පෙර පවා යූ ටියුබ්කරුවෙකු අනාවැකි පළකිරීම අහම්බයක් විය නොහැකි බවයි.

“හිටපු ජනාධිපතිවරයකු අත්අඩංගුවට ගැනීමක් සිදුවීමට පෙර යූ ටියුබ්කරුවෙකු අනාවැකි පළකරනවාද? එය අහම්බයක් විය නොහැකියි, එය සැලසුම් කළ හැකිද? සත්‍ය නම්, නීතිය හා සාමය වැනි පූජනීය දෙයක් ලාභ නාට්‍යමය රංගනයක් බවට පත්කරන දුක්බර දවසක්,” ඔහු ‘X’ හි සටහනක් තබමින් පැවැසීය.