චිත්‍රපට අධ්‍යක්ෂ සෝමරත්න දිසානායක ලෙස පෙනී සිටිමින් චිත්‍රපටවල රංගනයට අවස්ථාව දෙන බව පවසමින් කාන්තාවන්ගේ නිරුවත් ඡායාරූප එකතු කළ බවට චෝදනා ලැබූ 26 හැවිරිදි සැකකරු ඇප මත මුදා හැර තිබේ.

අධිකරණයේදී සහ මාධ්‍ය හරහා අධ්‍යක්ෂවරයාගෙන් සමාව අයැද සිටින ලෙස අධිකරණය ඔහුට නියෝග කළේය.

පොල්ගහවෙල ප්‍රදේශයේ පදිංචිකරුවකු වන සැකකාර ඉසුරු මධුමාල්ට කොළඹ ප්‍රධාන මහේස්ත්‍රාත් තනුජා ලක්මාලි ජයතුංග ඇප ලබා දුන්නාය.

අධ්‍යක්ෂ සෝමරත්න දිසානායක විසින් අපරාධ පරීක්ෂණ දෙපාර්තමේන්තුවේ (CID) සයිබර් අපරාධ අංශයට කරන ලද පැමිණිල්ලකට අනුව මෙම නඩුව ගොනු කර තිබිණි.

පැමිණිල්ලට අනුව, නාඳුනන පුද්ගලයකු විසින් චිත්‍රපට චරිත සඳහා තෝරා ගන්නා බව පවසමින් නිරුවත් ඡායාරූප ඉල්ලා කාන්තාවන් සම්බන්ධ කර ගැනීමට අධ්‍යක්ෂවරයාගේ නම සහ ඡායාරූපය භාවිත කරමින් ව්‍යාජ ෆේස්බුක් ගිණුමක් නිර්මාණය කර ඇත.

සැකකරු වෙනුවෙන් පෙනී සිටි ඔහුගේ නීතිඥවරයා ප්‍රකාශ කළේ, එල්ල වූ චෝදනා සඳහා වරද පිළිගැනීමට සැකකරු සූදානම් බවත්, අධ්‍යක්ෂවරයාට සිදු වූ අපහාසය සහ නින්දාව සම්බන්ධයෙන් ඔහු සමාව අයැදීමට කැමැත්ත පළ කළ බවත්, ප්‍රසිද්ධ මාධ්‍ය හරහා සමාව අයැදීමට අපේක්ෂා කරන බවත්ය.

සෝමරත්න දිසානායක වෙනුවෙන් පෙනී සිටි නීතිඥ මනෝජ් ගමගේ අධිකරණයට දන්වා සිටියේ මෙම සිදුවීම තම සේවාදායකයාගේ කීර්ති නාමයට සැළකිව යුතු හානියක් සිදු කර ඇතත්, ඔහු සැකකරුගේ සමාව පිළිගැනීමට සූදානම් බැවින් කිසිදු මූල්‍යමය වන්දියක් ඉල්ලා නොසිටි බවයි.

සිද්ධියෙන් තරුණ කාන්තාවන් විශාල පිරිසකට බලපෑම් වී ඇති බව ද මෙහිදී අවධානයට ගැනිණි.

අධිකරණයේදී සහ මාධ්‍ය හරහා ප්‍රසිද්ධියේ සමාව අයැදීමට සැකකරුට නියෝග කරන ලෙස නීතිඥවරයා තවදුරටත් අධිකරණයෙන් ඉල්ලා සිටියේය.

නඩු විස්තරවලට අනුව, සැකකරු රටේ විවිධ ප්‍රදේශවලින් වයස අවුරුදු 20ත් 35ත් අතර කාන්තාවන් අමතා, අධ්‍යක්ෂ සෝමරත්න දිසානායක ලෙස පෙනී සිටිමින් සහ චිත්‍රපටවල චරිත පොරොන්දු වී ඔවුන්ගේ නිරුවත් රූප ලබා ගෙන තිබේ.