අනාගතයේදී පාර්ලිමේන්තු මන්ත්‍රීවරුන්ගේ සහ රජයේ නිලධාරීන්ගේ භාවිතය සඳහා ඩබල් කැබ් රථ ආනයනය කිරීම රජය සලකා බලමින් සිටින නමුත්, අවසන් තීරණයක් තවමත් ගෙන නොමැති බව මහජන ආරක්ෂක අමාත්‍ය ආනන්ද විජේපාල පැවසීය.

ජාතික ජන බලවේගය ප්‍රමුඛ වත්මන් ආණ්ඩුව, රේගු බද්දකින් තොරව මන්ත්‍රීවරුන්ට වාහන ආනයනය කිරීම සඳහා බලපත්‍ර නිකුත් කිරීම නැවැත්වීය.

අතීතයේ දී, මන්ත්‍රීවරු එවැනි බලපත්‍ර භාවිතා කරමින් මිල අධික සුඛෝපභෝගී වාහන ආනයනය කළහ. නැතහොත්, රුපියල් මිලියන ගණනක ගාස්තු සඳහා මෙම බලපත්‍ර තෙවැනි පාර්ශවයන්ට විකිණීමට ඔවුහු කටයුතු කළහ.

කෙසේවෙතත්, රජය සෑම මන්ත්‍රීවරයෙකුටම වාහනයක් ලබාදීමට තීරණය කළේය. කෙසේවෙතත් මේ දක්වා රජය විසින් මන්ත්‍රීවරුන්ට වාහන වෙන්කර නොමැත.

වාහන පිළිබඳව විමසූ විට, පාර්ලිමේන්තු කටයුතු භාර මහජන ආරක්ෂක අමාත්‍ය ආනන්ද විජේපාල පවසා ඇත්තේ, මන්ත්‍රීවරුන්ගේ සහ රජයේ ආයතනවල භාවිතය සඳහා ඩබල් කැබ් රථ ආනයනය කිරීම රජය සලකා බලමින් සිටින බවයි.

“මේ මොහොතේ අපට ඇති අදහස මෙය. එය කවදා සිදුවෙනවාද කියලා අපි තීරණය කර නැහැ. එය මේ වසරේ හෝ ලබන වසරේ සිදුකරයිද යන්න අපි දන්නේ නැහැ” ඔහු පවසා ඇත.

නව ආණ්ඩුව මන්ත්‍රීවරුන් සඳහා පහසුකම් ගණනාවක් සීමාකර ඇත. පාර්ලිමේන්තු ආපනශාලාවේ පිරිනමන ආහාර වේල් දෙකක්, එනම් උදේ ආහාරය, දිවා ආහාරය සහ සවස කෙටි ආහාර සඳහා මන්ත්‍රීවරයකු දැන් රු. 2000 ක් ගෙවිය යුතුය.

ආණ්ඩුව මන්ත්‍රීවරුන් සඳහා රක්ෂණ ආවරණයේ වටිනාකම ද අඩුකළේය.

මන්ත්‍රීවරුන් සහ හිටපු රාජ්‍ය නායකයන් සඳහා විශ්‍රාම වැටුප් ප්‍රතිලාභ ද මේ මොහොතේ අහෝසි කිරීමට සැලසුම් කරමින් ඇත.

ශ්‍රී ලංකාව 2025 පෙබරවාරි 1 වැනි දින සිට සමහර වාහන ආනයනය සඳහා වූ තහනම ලිහිල් කළේය.

වෙනත් වාහන ආනයන සඳහා වූ සීමාවන් පසුව ඉවත් කිරීමේ සැලසුම් සමඟ බස් රථ, ට්‍රක් රථ සහ උපයෝගිතා වාහන ආනයනය නැවත ආරම්භ කිරීමට අවසර දෙන ලදී.

විදේශ විනිමය මත ඇති සීමාවන් හේතුවෙන් ශ්‍රී ලංකාව 2020 දී වාහන ආනයනය සඳහා තහනමක් පැනවීය. 2022 දී රට ඉතිහාසයේ දරුණුතම ආර්ථික අර්බුදයට ද මුහුණදුන්නේය.

කෙසේවෙතත්, වත්මන් ආණ්ඩුව විදේශ සංචිත ක්ෂයවීම වළක්වා ගැනීම සඳහා වාහන ආනයන ලිහිල් කිරීම සම්බන්ධයෙන් ප්‍රවේශමෙන් කටයුතු කරයි.