2025 වසර සඳහා වන පස්වැනි ශ්‍රේණියේ ශිෂ්‍යත්ව විභාගය හෙට (10) පැවැත්වීමට නියමිත බව විභාග දෙපාර්තමේන්තුව නිවේදනය කරයි.

විභාගය සඳහා වන විධිවිධාන පිළිබඳ මාධ්‍ය දැනුවත් කිරීම සඳහා විභාග කොමසාරිස් ජනරාල් ඒ.කේ.එස්. ඉන්දිකා කුමාරිගේ ප්‍රධානත්වයෙන් අද (9) උදෑසන මාධ්‍ය හමුවක් පැවැත්විණි.

එහිදී අදහස් දක්වමින් කොමසාරිස් ජනරාල්වරිය ප්‍රකාශ කළේ විභාගය පෙ.ව. 9:30ට ආරම්භ වන අතර අපේක්ෂකයන් පෙ.ව. 8:30 වන විට තම විභාග මධ්‍යස්ථාන වෙත පැමිණිය යුතු බවයි.

සියලුම අපේක්ෂකයන් පෙ.ව. 9:00 වන විට විභාග ශාලාවේ අසුන් ගත යුතු වේ.

දෙවැනි ප්‍රශ්න පත්‍රය පළමුව ලැබෙන බවත්, එය පෙ.ව. 9:30ට ආරම්භ වී පෙ.ව. 10:45ට අවසන් වන බවත්, පසුව විනාඩි 30ක විවේකයක් ලබා දෙන බවත් ඇය පැහැදිලි කළාය.

“පළමු ප්‍රශ්න පත්‍රය පෙ.ව. 11:15ට ආරම්භ වී ප.ව. 12:15ට අවසන් වනවා. එතනින් විභාගයේ වැඩ ඉවරයි,” යනුවෙන් ඇය සඳහන් කළාය.

විභාගය අතරතුර කිසියම් හදිසි අවස්ථාවක් ඇති වුවහොත්, අපේක්ෂකයන්ට හෝ මව්පියන්ට 117 ක්ෂණික දුරකථන අංකයට ඇමතිය හැකි බව කොමසාරිස් ජනරාල්වරිය වැඩිදුරටත් සඳහන් කළාය.

එවැනි තත්ත්වයන්ට කඩිනමින් විසඳුම් ලබා දීම සඳහා විශේෂ වැඩසටහනක් ක්‍රියාත්මක කර ඇති බව ද ඇය වැඩිදුරටත් පැවසුවාය.