August 1, 2025
ශ්‍රී ලංකා අපනයන සඳහා එක්සත් ජනපද තීරුබදු අනුපාතය 20% දක්වා අඩු කිරීම රටේ ප්‍රධාන වෙළඳ අරමුණුවලින් එකක් කරා යන ගමනේ ප්‍රගතිය සනිටුහන් කිරීමක් බව මුදල් අමාත්‍යාංශයේ ලේකම් ආචාර්ය හර්ෂණ සූරියප්පෙරුම පැවසීය.
“ප්‍රාථමික ඉලක්කය වුණේ කලාපීය වෙළෙඳපොළ තුළ තරඟකාරී තත්ත්වය පවත්වා ගනිමින් ශ්‍රී ලංකාවට ඉදිරියට යා හැකි ආකාරය තීරණය කිරීමයි,” යනුවෙන් ඔහු පැවසීය.
තීරුබදු ප්‍රතිශතය කෙරෙහි පමණක් නොව, මෙරට භාණ්ඩ හා සේවා අපනයනකරුවන් සඳහා වෙළඳපල කොටස පවත්වා ගැනීම කෙරෙහි ද අවධානය යොමු වූ බව ඔහු පැවසීය.
ශ්‍රී ලංකාවට පැනවෙන තීරුබදු අනුපාතය 20% දක්වා අඩු කිරීම සම්බන්ධයෙන් නිවේදනය කිරීම සඳහා පැවති රජයේ මාධ්‍ය හමුවකදී සූරියප්පෙරුම මෙය සඳහන් කළ අතර එය මෑත කාලීන වෙළඳ සාකච්ඡාවල සැළකිව යුතු ප්‍රතිඵලයක් ලෙස හැඳින්වීය.
අපනයනකරුවන් සහ ව්‍යවසායකයන් සඳහා තරඟකාරිත්වය සහතික කිරීම සාකච්ඡා සඳහා මූලික වූ බව ඔහු පැවසීය.
දෙරටටම අන්‍යෝන්‍ය ප්‍රතිලාභ ජනනය කරන ආකාරයෙන් දේශීය වෙළඳපොළ විවෘත කිරීම රජයේ අරමුණ බව සූරියප්පෙරුම පැවසීය.
භාණ්ඩ වෙළඳාමට පමණක් නොව දිගුකාලීන වර්ධනයට සහාය වීම සඳහා දැනුම හා තාක්ෂණය හුවමාරු කිරීමට ද පහසුකම් සැලසීම කෙරෙහි අවධානය යොමු කරන ලද පුළුල් ආර්ථික උපාය මාර්ග සාකච්ඡා කර තිබේ.
රජය දේශීය කර්මාන්ත කෙරෙහි ඇති බලපෑම නිරන්තරයෙන් තක්සේරු කළ බවත්, වෙළඳ ප්‍රවේශය පුළුල් කරමින් තීරණාත්මක අංශ ආරක්ෂා කිරීමට කැපවී සිටින බවත් ඔහු පැවසීය.
ශ්‍රී ලංකාව බලශක්ති, අමුද්‍රව්‍ය සහ කාර්මික සහ පාරිභෝගික භාවිතය සඳහා බොහෝ දුරට මූලාශ්‍ර කරන දියුණු යන්ත්‍රෝපකරණ නිෂ්පාදන ශුද්ධ ආනයනකරුවකු ලෙස සිටින බව සූරියප්පෙරුම පැවසීය.
තීරුබදු සහ අනු තීරුබදු යන දෙකම අවම කිරීම කෙරෙහි සාකච්ඡා අවධානය යොමු කළ බවත්, වෙළඳ පහසුකම් සැපයීම පිරිනැමීමේ ප්‍රධාන අංගයක් ලෙස හඳුනාගෙන ඇති බවත් ඔහු පැවසීය.
මෙයට රේගු ක්‍රියාපටිපාටි වැඩිදියුණු කිරීම, විනිවිදභාවය වැඩි කිරීම සහ දේශසීමා ආයතනවල නිලධාරිවාදී ප්‍රමාදයන් අඩු කිරීම සඳහා කැපවීම් ඇතුළත්වේ.
“අපගේ පිරිනැමීම පුළුල්, වෙළඳපොළ ප්‍රවේශය සහ ව්‍යාපාර කිරීමේ පහසුව සාධක කර ගනිමින් විදේශීය සහ දේශීය ව්‍යාපාර දෙකටම ප්‍රතිලාභ ලැබෙනු ඇතැයි අපි අපේක්ෂා කරනවා,” යනුවෙන් ආචාර්ය සූරියප්පෙරුම පැවසීය.
ඇඟලුම් අංශයේ කම්කරු නීතිවලට අදාළ ගැටළු සම්බන්ධයෙන් සූරියප්පෙරුම පැවසුවේ, වෙළඳ සාකච්ඡා පුළුල් පදනමක් මත සිදු වූ බවත්, දේශීය ව්‍යවසායකයන් සඳහා වෙළඳපල ප්‍රවේශය වැඩිදියුණු කිරීම සහ තාක්ෂණික වැඩිදියුණු කිරීම් හරහා නිෂ්පාදන පිරිවැය අඩු කිරීම කේන්ද්‍ර කරගත් බවත්ය.
අදාළ සියලුම රාජ්‍ය ආයතන දැනුවත් කර ඇති බවත් කිසිදු අංශයක් සළකා බැලීමෙන් බැහැර කර නොමැති බවත් ඔහු තහවුරු කළේය.
බුද්ධිමය දේපළ නීතිවලට ඇති විය හැකි වෙනස්කම්, තෙල් හෝ කෘෂිකාර්මික යෙදවුම් වැනි ආනයන සඳහා කෝටාවන් හෝ පුළුල් වෙළඳ සහන පිළිබඳ කළ විමසීමකට ඔහු පැවසුවේ සාකච්ඡාවල ස්වභාවය නිසා සමහර තොරතුරු රහසිගතව පවතින අතර, හැකි සෑම තැනකම ශ්‍රී ලංකාව විනිවිදභාවය පවත්වා ගෙන ඇති බවයි.
වඩාත් තරඟකාරී මිලකරණයක් ලබා ගැනීමේ අරමුණින් බලශක්ති ආනයනය ගැන ද සාකච්ඡා කළ බව ඔහු තහවුරු කළේය.
දේශීය අපනයනකරුවන් මුහුණ දෙන දිගුකාලීන අභියෝගවලට විසඳුමක් ලෙස වෙළඳ පහසුකම් සැපයීම ද ඉදිරිපත් කරන ලදී.
වෙළඳ සාකච්ඡා මගින් IMF සමඟ කොන්දේසි නැවත සාකච්ඡා කිරීමේ අවශ්‍යතාවක් ඇති කළ හැකිද යන ප්‍රශ්නවලට පිළිතුරු දෙමින් ආචාර්ය සූරියප්පෙරුම පැවසුවේ ශ්‍රී ලංකාව එකඟ වූ පරාමිතීන් තුළ දිගටම ක්‍රියාත්මක වන බවයි.
අවශ්‍ය ඕනෑම ගැළපීමක් සියලුම කොටස්කරුවන් සමඟ සාකච්ඡා කරනු ඇති බවත්, රජය බහුපාර්ශ්වික හවුල්කරුවන් සහ ව්‍යාපාරික ප්‍රජාව සමඟ සම්බන්ධීකරණයෙන් කටයුතු කරන බවත් ඔහු වැඩිදුරටත් පැවසීය.
“මෙය සාමූහික උත්සාහයක්. අපගේ අන්තර්ජාතික බැඳීම් ඉටු කරන අතරතුර ශ්‍රී ලංකාව වඩාත් තරඟකාරී කිරීමට අපි කැපවී සිටිනවා,” යැයි ඔහු පැවසීය.
මහ බැංකු අධිපති ආචාර්ය නන්දලාල් වීරසිංහ, ජනාධිපති ආර්ථික උපදේශක දුමින්ද හුලංගමුව, වෙළඳ අමාත්‍යාංශයේ ලේකම් විමලේන්ද්‍ර රාජා සහ අමෙරිකා එක්සත් ජනපදයේ ශ්‍රී ලංකා තානාපති මහින්ද සමරසිංහ ඇතුළු මෙම ක්‍රියාවලියට සම්බන්ධ නිලධාරීන්ට ආචාර්ය සූරියප්පෙරුම කෘතඥතාව පළ කළේය.
