ඩෙබිට් හෝ ක්‍රෙඩිට් කාඩ්පත් භාවිතයෙන් සිදුකරන ගනුදෙනු සඳහා වෙළෙන්දන්ට ගනුදෙනුකරුවන්ගෙන් 2.5% ක් වැනි අමතර ගාස්තුවක් අයකිරීමට නීත්‍යානුකූලව අවසර නොමැති බව ශ්‍රී ලංකා මහබැංකුව පැහැදිලි කර ඇත.

කාඩ්පත් ගෙවීමේ යන්ත්‍රයක් ලබාගැනීමේදී වෙළෙන්දන් සහ බැංකු අතර ගිවිසුම යටතේ, පාරිභෝගිකයා වෙත අමතර ගාස්තුවක් පැවරිය නොහැකි බව මහබැංකුව ප්‍රකාශ කළේය.

“වෙළෙන්දෙක් ලැයිස්තුගත මිලට වඩා වැඩි මුදලක් ඉල්ලා සිටියහොත්, ගනුදෙනුකරුවන් වහාම තම කාඩ්පත් නිකුත් කරන බැංකුවට ඒ බව වාර්තා කළ යුතුය,” මහබැංකු නිලධාරියෙක් ජනමාධ්‍ය හමුවේ පැවැසීය.

ඇතැම් වෙළඳසැල් සහ සේවා සපයන්නන් කාඩ්පත් ගෙවීම් සඳහා අමතර ගාස්තු එකතු කරන බවට පාරිභෝගිකයන්ගෙන් වැඩිවන පැමිණිලි මධ්‍යයේ මෙම පැහැදිලි කිරීම සිදුවිය.