July 22, 2025
සංවිධානාත්මක අපරාධ සහ මත්ද්‍රව්‍ය වෙළඳාමට සම්බන්ධ පුද්ගලයන්ට විවිධ අනිසි ක්‍රම මගින් විදේශ ගමන් බලපත්‍ර නිකුත් කිරීමේ සිද්ධීන් සම්බන්ධයෙන් විශේෂ පරීක්ෂණයක් ආරම්භ කර ඇති බව මහජන ආරක්ෂක අමාත්‍යාංශය පවසයි.
“සංවිධානාත්මක අපරාධ සහ මත්ද්‍රව්‍ය වෙළඳාමට සම්බන්ධ පුද්ගලයන්ට විදේශ ගමන් බලපත්‍ර නිකුත් කර ඇති බවට තොරතුරු ලැබී තිබෙනවා. එවැනි සිදුවීම් සම්බන්ධයෙන් දැනට පරීක්ෂණයක් සිදුවෙමින් පවතිනවා. ඉදිරියේදී වගකිව යුතු පාර්ශ්වයන්ට එරෙහිව අවශ්‍ය පියවර ගන්නවා.” යැයි මහජන ආරක්ෂක අමාත්‍ය ආනන්ද විජේපාල සඳහන් කර තිබේ.
එවැනි පරීක්ෂණ මගින් සිදුවීම් කෙරෙහිම පමණක් අවධානය යොමු කර ඇති අතර කිසිදු පුද්ගලයකු ඉලක්ක කර ගැනීම අරමුණු කර නොගන්නා බව ද ඔහු පැවසීය.
“මෙය එක් එක් අය ඉලක්ක කරගෙන කරන දෙයක් නෙවෙයි. අපි පෞද්ගලිකව පුද්ගලයන්ට එරෙහිව පරීක්ෂණ ආරම්භ කරන්නේ නැහැ. අපි සිදුවීම් විමර්ශනය කරමින් සිටින්නේ. අනාවරණය වන කරුණු මත පදනම්ව, වගකිව යුතු අයට එරෙහිව පියවර ගන්නවා,” අමාත්‍ය විජේපාල තවදුරටත් පැවසීය.
ආගමන හා විගමන දෙපාර්තමේන්තුවේ සහකාර පාලකවරයකු විසින් සංවිධානාත්මක අපරාධ සැකකරුවකු වන කෝරලගමගේ මන්දිනු පද්මසිරි හෙවත් ‘කෙහෙල්බද්දර පද්මේ’ හට ව්‍යාජ විදේශ ගමන් බලපත්‍ර තුනක් නිකුත් කිරීමේ චෝදනාව මත පසුගියදා අපරාධ පරීක්ෂණ දෙපාර්තමේන්තුව විසින් අත්අඩංගුවට ගන්නා ලදී.
එක්සත් අරාබි එමීර් රාජ්‍යයේ ඩුබායි හි සිටින කෙහෙල්බද්දර පද්මේ වෙනුවෙන් ව්‍යාජ විදේශ ගමන් බලපත්‍ර සකස් කිරීම සම්බන්ධයෙන් මීට පෙර අත්අඩංගුවට ගත් සැකකරුවන් දෙදෙනෙකු සහ එම නිලධාරියා අතර සම්බන්ධතා අනාවරණය කර ගැනීමෙන් පසුව මෙම අත්අඩංගුවට ගැනීම සිදු කර තිබේ.
