ප්‍රමාද වූ මහා පරිමාණ ව්‍යාපෘති ඒවායේ නියමිත කාල රාමු තුළ නිම කිරීම සඳහා ජනාධිපති අනුර කුමාර දිසානායක විසින් ඉදිරිපත් කරන ලද යෝජනාව මෙම සතියේ කැබිනට් මණ්ඩලය විසින් අනුමත කරන ලදී.

2027 අවසානයට පෙර ඒ සඳහා තවත් රුපියල් ට්‍රිලියන 1.4ක් අවශ්‍ය වනු ඇතැයි මුදල් අමාත්‍යාංශයේ ව්‍යාපෘති කළමනාකරණ සහ අධීක්ෂණ දෙපාර්තමේන්තුව පවසයි.

2024 රාජ්‍ය මූල්‍ය කළමනාකරණ පනත යටතේ, ව්‍යාපෘති කළමනාකරණ සහ අධීක්ෂණ දෙපාර්තමේන්තුව විසින් සෑම කාර්තුවකම මහා පරිමාණ සංවර්ධන ව්‍යාපෘතිවල මූල්‍ය හා භෞතික ප්‍රගතිය පිළිබඳ වාර්තාවක් සකස් කළ යුතුය.

2025 මාර්තු අවසානය වන විට තත්ත්වය විශ්ලේෂණය කළ එම නවතම වාර්තාව පසුගිය සඳුදා කැබිනට් මණ්ඩලයේ දී සාකච්ඡා කර තිබේ.

වාර්තාවෙන් හෙළි වූයේ, ක්‍රියාත්මක වෙමින් පවතින මහා පරිමාණ ව්‍යාපෘති 205න් පළමු කාර්තුව වන විට අවසන් කළ යුතුව තිබූ ව්‍යාපෘති 74ක් ඇතුළුව 145ක් මෙම වසරේ අවසන් කිරීමට නියමිත බවයි.

ලබන වසරේ තවත් ව්‍යාපෘති 24ක් අවසන් කිරීමට නියමිත අතර 2027 දී අවසන් කිරීමට තවත් ව්‍යාපෘති 19ක් තිබේ.

ව්‍යාපෘති කළමනාකරණ සහ අධීක්ෂණ දෙපාර්තමේන්තුවේ අවසන් වරට ලබා ගත හැකි වාර්තාව වන්නේ ‘මහා පරිමාණ සංවර්ධන ව්‍යාපෘතිවල සිව්වැනි කාර්තුවේ ප්‍රගතිය – 2024’ යන්නයි.

2024 අවසානය වන විට ක්‍රියාත්මක වෙමින් පැවති ව්‍යාපෘති 226 ක මුළු පිරිවැය රුපියල් ට්‍රිලියන 3.6ක් වනු ඇතැයි එමගින් ඇස්තමේන්තු කර තිබේ.

ව්‍යාපෘති පහක් හැර අනෙක් සියල්ල 2027 අවසානය වන විට නිම කිරීමට නියමිතය.

මේවාට පමණක් තවත් රුපියල් ට්‍රිලියන 1.4ක් අවශ්‍ය වනු ඇති බව වාර්තාවේ දැක්වේ.

ශ්‍රී ලංකාව නිරන්තරයෙන් ව්‍යාපෘති ප්‍රමාදයන්ට මුහුණදෙන අතර, ප්‍රධාන හේතු තුන වන්නේ කොන්ත්‍රාත්කරුවන්ගේ දුර්වල ක්‍රියාකාරිත්වය, ප්‍රමාණවත් ප්‍රතිපාදන ලැබීමේ ප්‍රමාදයන් සහ ප්‍රසම්පාදන ප්‍රමාදයන් ය.

භාණ්ඩාගාරයෙන් අරමුදල් නිකුත් කිරීමේදී ප්‍රමාදයක් සිදු නොවූවත්, ව්‍යාපෘති ක්‍රියාකාරකම් අපේක්ෂා කළ පරිදි ක්‍රියාත්මක නොවීම නිසා බිල්පත් ඉදිරිපත් කිරීමට අපොහොසත් වීම සැබෑ වියදම් ප්‍රමාදයන්ට ගෙතු වේ.

වඩාත්ම බලපෑමට ලක් වූ අංශ වන්නේ ප්‍රසම්පාදන ප්‍රමාදයන්, කොන්ත්‍රාත්කරුවන්ගේ දුර්වල ක්‍රියාකාරීත්වය, විෂය පථ වෙනස්කම් සහ අරමුදල් සපයන ආයතනවල තීරණ බව වාර්තාවේ දැක්වේ.

අධ්‍යාපනය, ජල සැපයුම, බලශක්තිය, සෞඛ්‍ය සහ වාරිමාර්ග යන අංශවල ද කාලය ඉක්මවූ ව්‍යාපෘති තිබිණි.