බදුල්ල කොට්ඨාශයේ සහකාර පොලිස් අධිකාරී ජී.ඩබ්ලිව්.බී.එස්. පලිපාන පවසා ඇත්තේ, වයස අවුරුදු 15 ක දරුවකුට HIV ආසාදනය වී ඇති බවත් එය බරපතල කනස්සල්ලට කරුණක් බවත්ය.

ලෝක සම සෞඛ්‍ය දිනය සැමරීම සඳහා බදුල්ල ශික්ෂණ රෝහලේ ඊයේ පැවැති සම්මන්ත්‍රණයක් අමතමින් ඔහු අනාවරණය කර ඇත්තේ, උපකාරක පන්තිවලට සහභාගී වීමේ මුවාවෙන් දරුවන් නිවසින් පිටව ගොස් වනාන්තරබද ප්‍රදේශවල විවිධ පුද්ගලයන් සමඟ දවස ගත කිරීමට පුරුදු වී සිටින බවයි.

“මේ ගැටලුව විසඳීම සඳහා සොරබොර වැව් රක්ෂිතයේ පොලිස් ආරක්ෂාව යොදවා තිබෙනවා. මහියංගන ප්‍රදේශයේ වයස අවුරුදු 15 ක දරුවෙකුට HIV ආසාදනය වී ඇති බව හෙළි වී තිබෙනවා. වයස අවුරුදු 16 ට අඩු දරුවෙකුට කැමැත්තෙන් වුවද අපයෝජනය කිරීම නීතිවිරෝධීයි,” ඔහු පැවසීය.

“ළමයින් තම පැහැය වෙනස් කර ගැනීමට රූපලාවන්‍ය ද්‍රව්‍ය භාවිතා කිරීමට පුරුදු වී සිටින අතර එමඟින් සමේ රෝග ඇති වෙනවා. වෛද්‍ය උපදෙස් නොමැතිව රූපලාවන්‍ය ද්‍රව්‍ය භාවිතා කිරීම සමේ ස්වාභාවික සුන්දරත්වය විනාශ කරන අතර සමට විශාල හානියක් සිදුකරනවා. විවාහක කාන්තාවන් රූපලාවන්‍ය ද්‍රව්‍ය සඳහා නාස්තිකාර වියදම් සිදුකිරීම නිසා පවුල් ආරවුල් ඇති කරනවා. පවුලේ සුභසාධනය සඳහා භාවිතා කළ යුතු තම ස්වාමිපුරුෂයන් උපයන මුදල් ඔවුන් නාස්ති කරනවා” යැයි සහකාර පොලිස් අධිකාරී පලිපාන තවදුරටත් පවසා ඇත.

චර්ම රෝග පිළිබඳ වෛද්‍ය විශේෂඥ වෛද්‍ය කසුන් ජයසිංහ, නියෝජ්‍ය රෝහල් අධ්‍යක්ෂ වෛද්‍ය ගයාන් කුරේ සහ මනෝචිකිත්සක වෛද්‍ය කමල් වල්ගම යන අයද මෙම සම්මන්ත්‍රණය අමතා තිබේ.