අද දින මීගමුව දුංගල්පිටිය ප්‍රදේශයේදී නියෝග නොසළකා හැරීම හේතුවෙන් පොලිසිය සිදුකළ වෙඩිතැබීමකින් එක් අයෙකුට තුවාල සිදුවී තිබේ.

පොලිසියට අනුව, මත්ද්‍රව්‍ය ජාවාරම පිළිබඳ තොරතුරක් ලැබීමෙන් පසු, යතුරුපැදියකින් පැමිණි පුද්ගලයන් දෙදෙනෙකු පරීක්ෂාව සඳහා ලෙල්ලම පාලම අසල නතරවන ලෙස පොලිසිය ඔවුන්ට නියෝග කර තිබේ.

යතුරුපැදිකරු නතර නොකර වේගයෙන් ඉදිරියට ගිය බැවින්, පොලිසිය පසුපස හඹා ගොස් ඇති අතර, පසුව යතුරුපැදිය ලොරියක ගැටී ඇත.

එක් සැකකරුවෙකු අත්අඩංගුවට ගැනීමට පොලිසිය සමත් වූ නමුත් අනෙක් සැකකරු පළාගොස් ඇති අතර, එහිදී පොලිසිය ඔහුව ලුහුබැඳ තිබේ.

අත්අඩංගුවට ගැනීම වළක්වා ගැනීමට උත්සාහ කිරීමේදී දෙවැනි සැකකරුගේ පාදයට පොලිස් නිලධාරීන් විසින් වෙඩි තබා ඇති බව පොලිසිය පැවසීය.

තුවාල ලැබූ සැකකරු මීගමුව රෝහලට ඇතුළත් කර ඇත.