July 2, 2025
වැඩ තහනමට ලක්ව සිටින පොලිස්පති දේශබන්දු තෙන්නකෝන්ට එරෙහිව බරපතල චෝදනා විමර්ශනය කරන ඉහළ පෙළේ කමිටුව සාක්ෂි රැස්කිරීමේ අදියර අවසන් කර ඇතැයි වාර්තා වේ.
ශ්රේෂ්ඨාධිකරණ විනිසුරු ප්රීති පද්මන් සූරසේනගේ ප්රධානත්වයෙන් යුත් එම කමිටුව සියලු පාර්ශ්වවලට ලිඛිත දේශන ඉදිරිපත් කළ යුතු අවසාන දිනය ලෙස ජූලි 8 වැනිදා දක්වා කාලය ලබා දී ඇත.
සමාප්ති සැසියේදී දේශබන්දු තෙන්නකෝන් වෙනුවෙන් පෙනීසිටි නීතිඥ සංජීව වීරවික්රම, අතුරුදන් වූ ලිපි ලේඛන සහ ජනමාධ්ය බලපෑම් සඳහන් කරමින් යුක්තිය තහවුරු කිරීමට කමිටුව අපොහොසත් වී ඇති බවට චෝදනා කළේය.
ඔහු එහිදී පවසා ඇත්තේ, එම කමිටුව යුක්තිය ඉටුකරනු ඇතැයි ඔවුන් කිසි විටෙකත් විශ්වාස නොකළ බව සහ තම සේවාදායකයා පෞද්ගලිකව ඉලක්ක කර ඇති බවයි.
එහිදී එම චෝදනා ප්රතික්ෂේප කරමින් විනිසුරු ප්රීති පද්මන් සූරසේන එම නීතීඥවරයාට පවසා ඇත්තේ, අසත්ය ප්රකාශ සිදුනොකරන ලෙස සහ සියලුම ලියකියවිලි ඉදිරිපත් කර තිබෙන බැවින් ඔහුගේ සේවාදායකයාට යුක්තිය ඉටුවීම ප්රතික්ෂේප කළ බව පැවසිය නොහැකි බවයි.
ජය-පරාජය පිළිබඳව මෙහි ප්රශ්නයක් නොමැති බව සහ වැදගත් වන්නේ යුක්තිය ඉටුවීම බව අතිරේක සොලිසිටර් ජනරාල් දිලීප පීරිස් මෙම ක්රියාවලියේ අඛණ්ඩතාව අවධාරණය කරමින් පවසා ඇත.
හිටපු පොලිස් මාධ්ය ප්රකාශක ජ්යෙෂ්ඨ පොලිස් අධිකාරී බුද්ධික මනතුංග සහ අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරී වයි. එස්. කීර්තිසිංහ මෙහිදී දේශබන්දු තෙන්නකෝන්ගේ අතුරුදන්වීම හා සම්බන්ධ සිදුවීම් සහ මහජන සන්නිවේදනයේ ප්රමාදය පිළිබඳව සාක්ෂි ලබාදී තිබේ.
පෙබරවාරි 27 වැනිදා මාතර අධිකරණය විසින් දේශබන්දු තෙන්නකෝන් සැකකරුවෙකු ලෙස නම් කිරීමෙන් දින දෙකකට පසු තෙන්නකෝන් අතුරුදන් වූ බව දැනගත් බව හිටපු පොලිස් මාධ්ය ප්රකාශකවරයා පිළිගත්තේය.
ඔහු තම මාධ්ය ප්රකාශ ආරක්ෂා කරමින් පවසා ඇත්තේ, ඒවා දෙපාර්තමේන්තු මගපෙන්වීම සහ මහජන බලපෑම් මත සිදුකළ ඒවා බවයි.
සහකාර පොලිස් අධිකාරී වයි. එස්. කීර්තිසිංහ, නුගේගොඩ, බෝපිටිය ඇතුළු ස්ථාන කිහිපයක දින 11ක කාලයක් සිදු කළ සෝදිසි මෙහෙයුමක් විස්තර කර ඇති අතර, ඔහු පවසා තිබුණේ සෝදිසි වරෙන්තුවක් නොතිබූ බව සහ ප්රාදේශීය නිලධාරීන්ගෙන් උපදෙස් ලබානොගත් බවයි.
ඔවුන් ක්රියාකළේ ඔවුන්ට ලද තොරතුරු මත පමණක් බව ද ඔහු පවසා තිබේ.
විමර්ශනයේ විශ්වසනීයත්වය අභියෝගයට ලක්කළ දේශබන්දු තෙන්නකෝන් වෙනුවෙන් පෙනීසිටි නීතිඥ සංජීව වීරවික්රම, ප්රධාන කාර්ය පටිපාටික පියවර නොසළකා හැර ඇති බව යෝජනා කර ඇති අතර, සහකාර පොලිස් අධිකාරී වයි.එස්. කීර්තිසිංහට ඔහුගේ සාක්ෂියේ කොටස් ගොතන බවට චෝදනා කර ඇත.
කෙසේවෙතත් සාක්ෂි විමසීමේ අදියර මේ වනවිට අවසන් වී ඇති හෙයින්, කමිටුවේ අවසන් තීරණය ලිඛිත ඉදිරිපත් කිරීම් මත රඳාපවතී.
දේශබන්දු තෙන්නකෝන් ස්ථිරවම ධුරයෙන් ඉවත් කරන්නේද යන්න තීරණය කළ හැක්කේ එහි ප්රතිඵලය අනුවය.
