දිවයින පුරා මාර්ගගත රථවාහන දඩ මුදල් ගෙවීමේ ක්‍රමයක් ක්‍රියාත්මක කිරීමට කැබිනට් මණ්ඩලය අනුමැතිය ලබා දී ඇති බව ප්‍රවාහන හා මහාමාර්ග අමාත්‍ය බිමල් රත්නායක පවසයි.

අධිවේගී මාර්ගවල ගමන් කරන වාහන සඳහා අනිවාර්ය ආසන පටි භාවිතය පිළිබඳ මහජනතාව දැනුවත් කිරීමේ වැඩසටහනකින් පසුව, කොට්ටාව අධිවේගී මාර්ග පිවිසුම අසල පැවති ජනමාධ්‍ය හමුවකදී ඔහු මේ බව ප්‍රකාශ කළේය.

“අද දින කැබිනට් මණ්ඩලය යෝජනාව අනුමත කළා. දැනට, ඔන්ලයින් දඩ මුදල් ගෙවීමේ ක්‍රමය ක්‍රියාත්මක කුරුණෑගල සහ අනුරාධපුර අතර පමණයි. දැන්, අපි සියලුම පොලිස් ඒකකවලට ජංගම උපාංග ලබාදෙනවා. එතකොට මේ වසරේ සිට රථවාහන දඩ මුදල් ඕනෑම තැනක සිට ජංගම දුරකථන හරහා ගෙවන්න පුළුවන්” අමාත්‍යවරයා පැවැසීය.

රජය දඩ මුදල් ගෙවීම පහසු කරන අතරම, එහි සැබෑ අරමුණ මාර්ග ආරක්ෂාව බව ඔහු අවධාරණය කළේය. “දඩ ගෙවීමට වඩා, ප්‍රවේශමෙන් රිය පැදවීමට, ආසන පටි පැළඳීමට සහ වෙනත් මාර්ග නීති උල්ලංඝනයන් වළක්වා ගන්න කියලා අපි ජනතාවගෙන් ඉල්ලා සිටිනවා. අපගේ මූලික පණිවිඩය සරලයි. ආරක්ෂිතව ගමන් කරන්න” ඔහු තවදුරටත් පැවසීය.