2000 දශකයේ මුල් භාගයේ ‘කාන්ත ලගා’ සංගීත වීඩියෝවේ පෙනීසිටීම නිසා ප්‍රසිද්ධියට පත් ඉන්දියානු නිළියක් සහ නිරූපිකාවක් වන ෂෙෆාලි ජරිවාලා, සිකුරාදා මුම්බායි හි ඇගේ නිවසේදී මියගොස් ඇත. මියයන විට ඇයට වයස අවුරුදු 42 කි.

මුම්බායි පොලිසියට අනුව, ජරිවාලා ඇගේ ඔෂිවාරා මහල් නිවාසයේදී ඇදවැටි ඇති අතර, ඇගේ සැමියා වන නළු පරාග් ත්‍යාගි විසින් ඇයව බෙල්වියු බහු විශේෂඥ රෝහලට ගෙනගොස් තිබේ. ඒ වන විටත් ඇය මියගොස් ඇති බව ප්‍රකාශ වී ඇත.

මූලික පරීක්ෂණවලින් පෙනීයන්නේ ඇයට හදිසි හෘදයාබාධයක් ඇති වූ බවයි. පොලිසිය හදිසි මරණ වාර්තාවක් නිර්දේශ කර ඇති අතර මේ අවස්ථාවේ කිසිදු වරදක් පිළිබඳව සැකනොකරන බව ප්‍රකාශ කර තිබේ.

නිලධාරීන් පැවසුවේ ඇය නිරාහාරව සිට ඇති බවත්, ඇගේ සාමාන්‍ය ඖෂධ සහ වයස්ගත වීම වැළැක්වීමේ එන්නතක් ලබාගෙන සිටි බවත්ය.

එමගින් රුධිර පීඩනයේ විශාල පහත වැටීමක් ඇති කිරීමට හේතු විය හැකි බවට වෛද්‍යවරු සැකකරති.

සෙනසුරාදා කූපර් රෝහලේ පශ්චාත් මරණ පරීක්ෂණයක් පවත්වන ලදී. ප්‍රතිඵල බලාපොරොත්තුවෙන් සිටී.

2002 දී කාන්ත ලගා හි පෙනීසිටීමත් සමඟ ජරිවාලා ක්ෂණික කීර්තියක් අත්කර ගත් අතර පසුව බිග් බොස් 13 ඇතුළු චිත්‍රපට සහ රියැලිටි වැඩසටහන් වල පෙනීසිටියාය.

ඇගේ අනපේක්ෂිත මරණය ඉන්දියානු විනෝදාස්වාද කර්මාන්තය පුරා රසිකයන් සහ සගයන් කම්පනයට පත්කර තිබේ.