2012 වර්ෂයේදී ග්‍රීක මූල්‍ය අර්බුදය සම්බන්ධයෙන්, හිටපු මහබැංකු අධිපති අජිත් නිවාඩ් කබ්රාල් සහ තවත් වගඋත්තරකරුවන් තිදෙනකුට එරෙහිව ගොනුකර ඇති නඩුව ඊයේ යළි කැදවිණි.

ග්‍රීසියේ ආර්ථික බිඳවැටීමක් පවතින බව දැනුවත්ව සිට, ග්‍රීක බැඳුම්කරවල මහජන අරමුදල් ආයෝජනය කිරීම සම්බන්ධයෙන් ශ්‍රී ලංකා රජයට රුපියල් බිලියන 1.8 ඉක්මවන පාඩුවක් සිදුකළ බවට ඔවුන්ට චෝදනා එල්ල වී තිබේ.

නඩු කටයුතු අතරතුර, අල්ලස් කොමිසමේ නීති නියෝජිතයා අධිකරණයට දැනුම්දුන්නේ අදාළ නඩු ලේඛන එදින විත්තිකරුට භාරදෙන බවයි.

නඩුවට අදාළ මූලික විරෝධතා ප්‍රතික්ෂේප කිරීම අභියෝගයට ලක්කරමින් විත්තිකරු දැනටමත් අභියාචනාධිකරණය හමුවේ සංශෝධන අයැදුම්පත් තුනක් ගොනුකර ඇති බවත් අනාවරණය විය.

මෙම අයැදුම්පත් එළඹෙන සැප්තැම්බර් 19 වන දින සමාලෝචනය කිරීමට නියමිතය.

මෙම කරුණු සැළකිල්ලට ගනිමින්, අභියාචනාධිකරණ විභාගයෙන් පසු නඩු දිනයක් සඳහා කල්තැබීම සුදුසු බව මහාධිකරණ විනිසුරුවරයා ප්‍රකාශ කළේය.

නඩුව හුදෙක් පෙනීසිටීම සඳහා කැඳවන්නේ නැති බව ද විනිසුරුවරයා පැහැදිලි කළ අතර, ඒ සඳහා සුදුසු දිනයක් යෝජනා කරන ලෙස නීතිඥවරුන්ගෙන් ඉල්ලා සිටියේය.

ඒ අනුව, නඩුව ඔක්තෝබර් 10 වන දිනට කැඳවීමට නියෝග කෙරිණි.