ශ්‍රී ලංකාවේ මෙහෙයුම්වලට බාධා එල්ල වී ඇති බවට එල්ල වන චෝදනාවලට ප්‍රතිචාර දක්වමින් සිංගප්පූරුව පදනම් කරගත් නිෂ්පාදන සමාගමකට අපනයන සීමා පැනවීමට කටයුතු කර නැති බව ශ්‍රී ලංකා ආයෝජන මණ්ඩලය පවසයි.

නිවේදනයක් නිකුත් කරමින් ආයෝජන මණ්ඩල නිලධාරීන් පැහැදිලි කළේ Honor Global Singapore සමාගමට අපනයන තහනම් කිරීම් හෝ සීමාවන් පනවා නොමැති බවයි.

ඇතැම් නිෂ්පාදන අපනයනය කිරීම සඳහා 2023 දෙසැම්බර් මාසයේදී අනුමත කරන ලද අදාළ සමාගමට එහි අපනයන කටයුතු දිගටම කරගෙන යෑමට පූර්ණ බලය ඇති බව ආයෝජන මණ්ඩල පැවසීය.

කෙසේවෙතත්, ලෝක වෙළඳ සංවිධානයේ සාමාජිකයකු ලෙස ශ්‍රී ලංකාව ගෝලීය නීති මත පදනම් වූ වෙළඳ පද්ධතියට අනුගත වන බව ආයෝජන මණ්ඩලය අවධාරණය කළේය.

ලෝක වෙළඳ සංවිධානයේ බැඳීම් යටතේ, සාමාජික රටවලට අසාධාරණ ලෙස සහනාධාර හෝ අඩු මිල ගණන් යටතේ ආනයන මගින් දේශීය කර්මාන්තවලට තර්ජනයක් එල්ල වුවහොත් ප්‍රතිවිරෝධී තීරුබදු වැනි වෙළඳ ප්‍රතිකර්ම විමර්ශනය කර යෙදිය හැකිය.

ආයෝජන මණ්ඩලය තහවුරු කළේ, සමාගම, වාණිජ දෙපාර්තමේන්තුව සහ වෙළඳ, වාණිජ හා ආහාර සුරක්ෂිතතා අමාත්‍යාංශය සමඟ සාකච්ඡා කළේ සීමා පැනවීම නොව, මෙම ලෝක වෙළඳ සංවිධානයේ අනුමත වෙළඳ ආරක්ෂණ විධිවිධානවලට අනුකූල වීම සහතික කිරීම කෙරෙහි බවයි.

මෙරට ෆෝම් මෙට්ට නිෂ්පාදන කම්හලක ආයෝජනය කර ඇති සිංගප්පූරු සමාගම, මෙහෙයුම් වසා දැමීම සළකා බලමින් සිටින බව ප්‍රකාශ කිරීමෙන් පසුව ආයෝජන මණ්ඩලය මෙම පැහැදිලි කිරීම සිදු කර ඇත.

මාධ්‍ය අමතමින්, හොනර් ග්ලෝබල් ඉන්ඩස්ට්‍රීස් නියෝජිතයන් පැවසුවේ, කර්මාන්ත ශාලාව මගින් වාර්ෂිකව ශ්‍රී ලංකාවේ ෆෝම් මෙට්ට මිලියන 2.5ක් පමණ නිෂ්පාදනය කර වෙනත් විවිධ රටවලට අපනයනය කිරීමට අවසර ඉල්ලා සිටි නමුත්, 2024 මාර්තු මාසයේදී අවශ්‍ය අනුමැතිය ලැබීමෙන් ටික කලකට පසු, අමෙරිකා එක්සත් ජනපදයට අපනයනය කිරීම වසරකට මෙට්ට 50,000කට සීමා කරන බව ආයෝජන මණ්ඩලය ලිඛිතව දැනුම් දී ඇති බවයි.

“අපට මෙට්ට කුඩා සංඛ්‍යාවක් සඳහා කර්මාන්ත ශාලාවක් ක්‍රියාත්මක කළ නොහැකියි. ආයෝජන මණ්ඩලය සහ මුදල් මණ්ඩලය යන දෙකම පසුගිය මාස හය තුළ මෙම කාරණය ඇදගෙන ගියා. මෙම තත්ත්වය හේතුවෙන් සේවකයන් 500කට ආසන්න සංඛ්‍යාවක් රැකියා අහිමිවීමට මුහුණ දී සිටිනවා,” ඔවුන් තවදුරටත් පැවසීය.