මාතර වැලිගම W15 හෝටලයේ සිදු වූ වෙඩිතැබීමට සම්බන්ධ වීමට තමාට කිසිදු හේතුවක් නොමැති බව පොලිස්පති දේශබන්දු තෙන්නකෝන් ඊයේ (23) ප්‍රකාශ කළ අතර ඔහුට එරෙහි පවතින සියලු චෝදනා දේශපාලනික වශයෙන් ඉදිරිපත්ව ඇති බව ප්‍රකාශ කර තිබේ.

ඔහුට එරෙහි චෝදනා විමර්ශනය කරන පාර්ලිමේන්තු කමිටුව ඉදිරියේ පළමු වරට සාක්ෂි දෙමින් ඔහු මෙම අදහස් පළකර ඇත.

පොලිස්පතිවරයාගේ ක්‍රියාමාර්ග පරීක්ෂා කරන පාර්ලිමේන්තු කමිටුව ඊයේ (23) දිනට 10 වැනි වරටත් පාර්ලිමේන්තු සංකීර්ණයේදී රැස්විය.

ඔහුට එරෙහිව එල්ල වී ඇති චෝදනා සම්බන්ධයෙන් සාක්ෂි සැපයීම සඳහා පොලිස්පතිවරයා කමිටුව ඉදිරියේ පෙනීසිටි පළමු අවස්ථාව මෙය විය.

දේශබන්දු තෙන්නකෝන්ට එරෙහිව පවතින විෂමාචාර සහ බරපතල අපයෝජන චෝදනා විමර්ශනය කර වාර්තා කිරීම සඳහා මෙම ත්‍රිපුද්ගල විමර්ශන කමිටුව පත්කර ඇත.

ශ්‍රේෂ්ඨාධිකරණ විනිසුරු ප්‍රීති පද්මන් සූරසේනගේ සභාපතිත්වයෙන්, විනිසුරු ඩබ්ලිව්.එම්.එන්.පී. ඉද්දවෙල සහ ජාතික පොලිස් කොමිසමේ සභාපති ඊ.ඩී.එම්. ලලිත් ඒකනායකගේ සහභාගීත්වයෙන් පාර්ලිමේන්තු සංකීර්ණයේදී කමිටුව රැස්විය.