ආහාර හා කෘෂිකර්ම සංවිධානයේ පර්යේෂණ නෞකාවකට මෙරටට ළඟාවීම සඳහා අවසර ලබා දී ඇති බව විදේශ කටයුතු අමාත්‍යාංශය තහවුරු කරයි.

එම නෞකාව ලබන අගෝස්තු 15 සිට 20 දක්වා සිය මුහුදු තීරයේ නැංගුරම් ලා තැබෙනු ඇතැයි ද එම අමාත්‍යංශය පවසයි.

විදේශ කටයුතු අමාත්‍යාංශය මෙම තීරණය ගෙන තිබුණේ මෙරටින් විධිමත් ප්‍රතිචාරයක් නොලැබීම හේතුවෙන් ආහාර හා කෘෂිකර්ම සංවිධානය විසින් ක්‍රියාත්මක කරන එක්සත් ජාතීන්ගේ ධජය සහිත Dr. Fridtjof Nansen යාත්‍රාවේ මෙරට සංචාරය සඳහා වූ පූර්ව සැලැස්ම අවලංගු කිරීමෙන් පසුවය.

ධීවර අමාත්‍යාංශය සහ එක්සත් ජාතීන්ගේ සංවිධානය හරහා සම්බන්ධීකරණය කරන ලද යාත්‍රාවේ පැමිණීම දේශගුණයට අදාළ වැඩසටහන් සඳහා සහායවීමට සහ අත්‍යවශ්‍ය සමුද්‍ර දත්ත සැපයීමේ අරමුණින් සිදුකරන්නකි.

විදේශීය පර්යේෂණ යාත්‍රා සඳහා මෙරට පනවා තිබූ වසරක තහනම ඉකුත් දෙසැම්බර් මාසයෙන් අවසන් විය.

ඒ වෙනුවෙන් නව සම්මත මෙහෙයුම් ක්‍රියාපටිපාටි‍යක් කෙටුම්පතක් සකස්කිරීම සඳහා රජය කමිටුවක් පත්කර තිබේ.

මේ අතර එක්සත් ජාතීන්ගේ සංවිධානය අනතුරු ඇඟවූයේ, Dr. Fridtjof Nansen නෞකාවේ සංචාරය අවලංගු කිරීම නිසා ශ්‍රී ලංකාවට ඩොලර් මිලියනයකට වඩා ආධාර අහිමි විය හැකි අතර, එය අනාගත හරිත දේශගුණික අරමුදලේ වැඩසටහන්වලට බලපානු ඇති බවයි.