June 21, 2025
රටේ පුරාවිද්යා උරුමයන් ආරක්ෂා කිරීම සඳහා පිහිටුවා ඇති විශේෂ පොලිස් ඒකකය එක් නිලධාරියකු දක්වා අඩුකර ඇතැයි වාර්තා වේ.
කොළඹ පුරාවිද්යා දෙපාර්තමේන්තු පරිශ්රයේ පිහිටි මෙම ඒකකය ස්ථාපිත කළ මුල් අවධියේදී නිලධාරීන් 32ක් පමණ ඊට අනියුක්ත කර තිබිණි.
කෙසේවෙතත්, එය දැන් ක්රියාත්මක වන්නේ, පැමිණිලිවලට ප්රතිචාර දැක්වීමට හෝ ක්ෂේත්ර පරීක්ෂණ පැවැත්වීමට වාහනයක් හෝ ලබාදී නොමැති එක් ක්රියාකාරී නිලධාරියකු සමඟ පමණි.
පුරාවිද්යා වස්තු හෝ ස්ථාන විනාශය වාර්තා කිරීම සඳහා වූ ක්ෂණික ඇමතුම් අංකය වන 011-2694727 මාස ගණනක සිට අක්රීයව පැවතුණු අතර එය මෑතකදී යළි ක්රියාත්මක කර තිබේ.
එම දුරකතන අංකය හරහා ලැබෙන පැමිණිලි ප්රාදේශීය පොලිස් ස්ථාන වෙත යොමුකෙරේ.
එම සිද්ධීන් පසු විපරම් කරන්නේ කෙසේද යන්න නිරීක්ෂණය කිරීමට කිසිදු ක්රමවේදයක් ක්රියාත්මක නොවන අතර, පසුකාලීන විමර්ශනවල සාර්ථකභාවය ද පැහැදිලි නොමැත.
කොළඹ කේන්ද්ර කරගත් ඒකකය පූර්ණ වශයෙන් ක්රියාත්මක වූ කාලයේ සහ සෘජු ස්ථානීය පරීක්ෂණ පැවැත්වීමට හැකියාව පැවැති කාලය තුළ නීතිවිරෝධී කැණීම් සහ ඓතිහාසික ස්ථානවලට සිදුවන හානි වැළැක්වීමේ කැපීපෙනෙන සාර්ථකත්වයක් නිරීක්ෂණය වී තිබේ.
එහෙත් එවැනි සිදුවීම් ඉහළ යමින් ඇති පසුබිමක වත්මන් කාර්ය මණ්ඩල හා සම්පත් හිඟය මෙහෙයුම් අඩපණ කිරීමට හේතුවී ඇත.
එබැවින් මෙරට පිහිටි සංස්කෘතික උරුම විනාශ වී යාමට පෙර පුරාවිද්යා දෙපාර්තමේන්තුව සහ නීතිය ක්රියාත්මක කරන ආයතන අතර වඩා හොඳ සම්බන්ධීකරණයක් සඳහා එම ඒකකය ශක්තිමත් කිරීමට කඩිනම් පියවර ගන්නා ලෙස සංස්කෘතික හා උරුමයන් සංරක්ෂණය කරන පාර්ශව රජයෙන් ඉල්ලා සිටියි.
