ජුනි 20 වැනි දින මහනුවර උඩුව ප්‍රදේශයේ පදිංචි 32 හැවිරිදි පුද්ගලයෙකු ව්‍යාජ මුදල් ළඟ තබාගැනීම සම්බන්ධයෙන් හතරලියද්ද පොලිසිය විසින් අත්අඩංගුවට ගෙන ඇත.

සැකකරු ප්‍රදේශයේ වෙළඳසැලකින් රුපියල් 5,000 ව්‍යාජ නෝට්ටුවක් මාරුකිරීමට උත්සාහ කළ බවත්, එම හේතුව මත ඔහුව අත්අඩංගුවට ගත් බවත් පොලිසිය පැවැසීය.

ඔහු සතුව තිබී රුපියල් 5,000 ව්‍යාජ නෝට්ටු තුනක්, රුපියල් 500 ව්‍යාජ නෝට්ටු දෙකක් සහ රුපියල් 100 ව්‍යාජ නෝට්ටු දෙකක් සොයාගැනීමට නිලධාරීන්ට හැකිව තිබේ.

සැකකරුගේ නිවස පරීක්ෂා කිරීමේදී රුපියල් 50 නෝට්ටු නවයක්, රුපියල් 100 නෝට්ටු හතරක්, රුපියල් 500 නෝට්ටු හතරක් සහ රුපියල් 5,000 නෝට්ටු හයක් නිෂ්පාදනය සඳහා භාවිත කළ බවට විශ්වාස කෙරෙන මුද්‍රිත කොළ කිහිපයක් සොයාගෙන ඇත.

වැඩිදුර විමර්ශනයේදී පොලිසිය ගලගෙදර සැක සහිත මුද්‍රණ ස්ථානයකට ගොස් ඇති අතර, එහිදී මුද්‍රණය සඳහා භාවිත කළ බවට විශ්වාස කෙරෙන පරිගණකයක් සහ මුද්‍රණ යන්ත්‍රයක් අත්අඩංගුවට ගෙන තිබේ.

විමර්ශනය දිගටම ක්‍රියාත්මක බව පොලිසිය පවසයි.