June 20, 2025
විදේශයන්හි ගෘහස්ත නොවන රැකියා සඳහා නව සේවා ගිවිසුමක් යටතේ ලියාපදිංචි වීමට පෙර අදාළ රටෙහි ශ්රී ලංකා දූත මණ්ඩලය සමඟ රැකියා ගිවිසුම් සහතික කිරීම අනිවාර්ය බව ශ්රී ලංකා විදේශ සේවා නියුක්ති කාර්යාංශය නිවේදනය කරයි.
කාර්යාංශය ප්රකාශ කළේ, නව රෙගුලාසිය ජුනි 7 වැනිදා ක්රියාත්මක කිරීමට මුලින් සැලසුම් කර තිබුණද, තෝරාගත් රටවල් සඳහා එය ජූලි 1 වැනිදා සිට ක්රියාත්මක වන බවයි.
සෞදි අරාබිය, කුවේට්, බහරේනය, කටාර්, එක්සත් අරාබි එමීර් රාජ්යය, ඕමානය, ඊශ්රායලය, ජෝර්දානය, ලෙබනනය, මාලදිවයින, මැලේසියාව, සිංගප්පූරුව සහ දකුණු කොරියාව වැනි ශ්රී ලාංකික ශ්රමිකයන් විශාල සංඛ්යාවක් සේවය කරන රටවල් ඊට ඇතුළත් වේ.
ගෘහස්ත නොවන රැකියා සඳහා මෙම අනිවාර්ය සහතික කිරීමේ අවශ්යතාවය සියලුම රටවලට දීර්ඝ කිරීමට මින් පෙර තීරණය කර තිබුණද, ජුනි 12 වැනි දින රැස්වූ ශ්රී ලංකා විදේශ සේවා නියුක්ති කාර්යාංශයේ අධ්යක්ෂ මණ්ඩලය, එය වහාම ක්රියාත්මක කිරීම මෙම නිශ්චිත රටවලට සීමාකිරීමට තීරණය කර තිබේ.
මේ අතර නව සේවා ගිවිසුමක් යටතේ වෘත්තීය කාණ්ඩයේ රැකියා සඳහා තනිව විදේශගත වන වෘත්තිකයන් මෙම අවශ්යතාවයෙන් නිදහස් කෙරේ.
කාර්යාංශයේ ලියාපදිංචි කිරීමේදී ඔවුන්ගේ වෘත්තීය තත්ත්වය හෝ ඔවුන්ගේ රැකියාවේ ස්වභාවය සනාථ කරන උපකාරක ලේඛන පමණක් ඉදිරිපත් කිරීමට ප්රමාණවත් වේ.
එමෙන්ම විදේශ සේවා නියුක්ති කාර්යාංශය පැවසුවේ, මිනිස් ජාවාරම් සම්බන්ධයෙන් වර්ධනය වන කනස්සල්ල සහ විදේශගත ශ්රී ලාංකික ශ්රමිකයින් මීට පෙර මුහුණ දුන් දුෂ්කරතා සම්බන්ධයෙන් සළකාබලා මෙම තීරණය ගත් බවයි.
මෙම නව රෙගුලාසිය හරහා සංක්රමණික ශ්රමිකයන්ට වැඩි ආරක්ෂාවක් සහතික කිරීම සහ විදේශයන්හි සුරක්ෂිත රැකියා අවස්ථා ප්රවර්ධනය කිරීම කාර්යාංශයේ අරමුණයි.
එබැවින් විදේශ රැකියා ක්රියාවලිය විධිමත් කිරීම සහ සේවක ආරක්ෂාව ඉහළ නැංවීම සඳහා සංශෝධිත මාර්ගෝපදේශ පිළිපදින ලෙස එම කාර්යාංශය සියලුම සංක්රමණික සේවකයන්ගෙන් සහ බඳවා ගැනීමේ ආයතනවලින් ඉල්ලා සිටී.
