වැල්ලවත්ත සුඛෝපභෝගී මහල් නිවාස සංකීර්ණයකින් හමුවූ රන් ආලේපිත T-56 ගිනි අවිය පිළිබඳ විමර්ශනයේදී, හිටපු ජ්‍යෙෂ්ඨ අමාත්‍ය බර්ටි ප්‍රේමලාල් දිසානායකගේ ප්‍රධාන ආරක්ෂක නිලධාරියා, තමා එම ගිනි අවියට කිසිදු සම්බන්ධයක් නොමැති බව ප්‍රකාශ කර ඇත.

ගිනි අවිය මධ්‍යම පොලිස් අවි ගබඩාවෙන් නිකුත් කර නොමැති බවත්, එහි මූලාරම්භය පිළිබඳව තවත් ප්‍රශ්න පවතින බවත්, විමර්ශකයන් විසින් ගල්කිස්ස මහේස්ත්‍රාත් අධිකරණයට හෙළි කර තිබේ.

මෙම නඩුවට අදාළව හිටපු අමාත්‍ය දුමින්ද දිසානායක ඊයේ (19) දිනයේ අධිකරණයට ඉදිරිපත් කරන ලද අතර, ත්‍රස්ත විමර්ශන අංශයේ නිලධාරීන් විසින් නඩුවේ නවතම සොයාගැනීම් සම්බන්ධයෙන් ඒකාබද්ධ වාර්තාවක් මහේස්ත්‍රාත් චතුරිකා ද සිල්වා වෙත ඉදිරිපත් කර ඇත.

එහිදි, මහේස්ත්‍රාත්වරිය විසින් හිටපු අමාත්‍යවරයා සහ තවත් සැකකරුවන් තිදෙනකු ලබන (26) දින දක්වා රක්ෂිත බන්ධනාගාරගත කිරීමටත්, කෝකියාගෙන් විධිමත් ප්‍රකාශ සටහන් කර ගැනීමටත් නියෝග කර තිබේ.

වැල්ලවත්ත හැව්ලොක් නිවාස සංකීර්ණයක තිබී මෙම ගිනි අවිය සොයාගන්නා ලද අතර, එහිදී කාන්තාවන් දෙදෙනකුද අත්අඩංගුවට ගන්නා ලදී.

පසුව, හිටපු අමාත්‍ය දුමින්ද දිසානායක සහ ඔහුගේ යටතේ සිටි කෝකියා ද අත්අඩංගුවට ගෙන ඇත.

ගිනි අවිය අඩංගු බෑගයෙන් ගුවන් ටිකට්පත් දෙකක් ද සොයාගත් බව පොලීසිය පවසයි.

විමර්ශනවලදි, ආයුධය හෝ ගමන් ලියකියවිලි සම්බන්ධයෙන් කිසිදු දැනුමක් නොමැති බව එම ගුවන් ටිකට්පත්වල නම් සඳහන් පුද්ගලයන් ප්‍රකාශ කර ඇත.