කොළඹ නාලන්දා විද්‍යාලය ආරම්භ කර එළැඹෙන නොවැම්බර් 01 දිනට වසර 100ක් සැපිරෙයි.

නාලන්දා විද්‍යාලයේ ශත සංවත්සරයට සමගාමීව වැඩසටහන් රාශියක් ක්‍රියාත්මක කෙරෙන අතර එහි ප්‍රධානතම වැඩසටහන වන්නේ රුපියල් මිලියන 600ක ව්‍යාපෘතියක් ලෙස ඉදිවන නාලන්දා විද්‍යාලයීය නවොත්පාදන මධ්‍යස්ථානය සහ ගෘහස්ථ ක්‍රීඩා සංකීර්ණයයි.

මෙම වැඩසටහනට සමගාමීව නාලන්දා සියවස් සැමරුම් පාගමන – 2025, එළැඹෙන ජූලි 20 දින පැවැත්වීමට සියලු කටයුතු සූදානම් කර ඇත.

මෙවර නාලන්දා පාගමන පැවැත්වෙන්නේ ද වසර 13කට පසුවය.

නාලන්දා ආදි ශිෂ්‍යය සංගමය, නාලන්දා කණිෂ්ට ආදිශිෂ්‍යය සංගමය සහ ආදි නාලන්දීය ක්‍රීඩා සංගමය සංවිධානය කරන මෙම පා ගමන නාලන්දා විද්‍යාලයීය මලලසේකර ශාලාව අසළින් ආරම්භ වී පුංචි බොරැල්ල, මරදාන, ඩීන්ස් පාර, ඇස් වාට්ටුව හන්දිය, මහජන පුස්තකාලය, ටෙනිස් සංගම් ටෙනිස් ක්‍රීඩා පිටිය , ජාතික කෞතුකාගාරය පසුකර ග්‍රීන් පාත් වෙත ළඟාවීමට නියමිතය.

මෙම පාගමන පිළිබඳව දැනුවත් කිරිමා සඳහා ඊයේ(17) විද්‍යාල පරිශ්‍රයේ පැවැත්වූ ජනමාධ්‍ය හමුවේදී අදහස් දැක්වූ නාලන්දා විද්‍යාලයේ විදුහල්පති යූ.ඩී ඉරාන් චම්පික ද සිල්වා මෙසේ ද පැවැසීය.

“කොළඹ නාලන්දා විද්‍යාලය අද සුවිශේෂි සංධිස්ථානයකට පැමිණ තියෙනවා. ඒ තමයි සියවස් සැමරුම. පාසැලක් වශයෙන් අපි ගතවූ වසර සියය තුළ අධ්‍යාපනික වශයෙන් දැවැන්ත පෙරළියක් සිදුකර තියෙනවා. පහ වසර ශිෂ්‍යත්ව විභාගය, අධ්‍යයන පොදු සහතික පත්‍ර සාමාන්‍යය පෙළ සහ උසස් පෙළ විභාගවලින් වගේම ක්‍රීඩා සහ වෙනත් විෂය බාහිර කටයුතුවලදී අප පාසැල ලබාගත් ජයග්‍රහණ ඊට හොඳම නිදසුන් සපයනවා.

නාලන්දා විද්‍යාලයේ සියවස් සැමරුමට සමගාමීව සුවිශේෂී ව්‍යෘපෘති රැසක් අපි දියත් කරලා තියෙනවා. රුපියල් මිලියන 600ක ව්‍යාපෘතියක් ලෙස ඉදිවන නාලන්දා විද්‍යාලයීය තාක්ෂණ විද්‍යාගාරය සහ ගෘහස්ථ ක්‍රීඩා සංකීර්ණය තමයි සියවස් සැමරුම් ව්‍යාපෘතියේ සුවිශේෂීම වැඩසටහන. මේ වැඩසටහන්වලට සමගාමීව නාලන්දා පාගමන – 2025 පැවැත්වීමට අපි සියලු කටයුතු සූදානම් කර තියෙනවා. 2012 වසරේදී තමයි මීට පෙර අවසන්වරට නාලන්දා පාගමන පවත්වා තියෙන්නේ. ඉතින් මම පාසැලේ සියලුම ආදි ශිෂ්‍යයින්ට ආරාධනා කරනවා මෙවර වසර 13කට පසුව පැවැත්වෙන් නාලන්දා පාගමන – 2025ට ඔබේ සහභාගීත්වය ලබා දෙන්න කියලා.”