සංවිධානාත්මක අපරාධකරුවකු ලෙස චෝදනා ලැබු පොරවකර ආරච්චිලාගේ ප්‍රමේෂ් නොහොත් ‘චුට්ටා’ගේ වත්කම් කිහිපයක් අත්හිටුවීමට පියවර ගෙන තිබේ.

නීතිවිරෝධී වත්කම් විමර්ශන අංශය විසින් සිදුකරන ලද පරීක්ෂණයකින් පසුව මෙම පියවර ගෙන ඇති අතර, එමඟින් නීතිවිරෝධී ලෙස උපයාගත් ධනය පිළිබඳ සාක්ෂි අනාවරණය කරගෙන ඇත.

පොලිසියට අනුව, සැකකරු කේරළ ගංජා, ස්ඵටික මෙත් (ICE) ප්‍රවාහනය සහ නිධන් හෑරීමේ නිරතවීම ඇතුළු නීතිවිරෝධී ක්‍රියාකාරකම් හරහා විශාල ලෙස වත්කම් රැස්කර ඇති බවට විශ්වාස කරයි.

රාජාංගණය ප්‍රජා පොලිස් කමිටුවේ පෙත්සමක් මගින් ආරම්භ කරන ලද පරීක්ෂණයකදී මෙම තොරතුරු සොයාගෙන තිබේ.

සැකකරු විවිධ වැරදි සම්බන්ධයෙන් අවස්ථා කිහිපයකදී අත්අඩංගුවට ගෙන ඇති බවත්, දැනට නීතිමය ක්‍රියාමාර්ග ගනිමින් සිටින බවත්, පොලිසිය පවසයි.

විමර්ශනයේ ප්‍රතිඵලයක් ලෙස, චුට්ටාගේ නමින් ලියාපදිංචි කර ඇති රුපියල් මිලියන 12 ක් වටිනා මෝටර් රථයක් සහ රාජාංගණයේ කිඹුල මංකඩ ප්‍රදේශයේ රුපියල් මිලියන 8 ක් වටිනා ඉඩමක් නිලධාරීන් විසින් අත්හිටුවා ඇත.

ඔහු ඊයේ තඹුත්තේගම මහේස්ත්‍රාත් අධිකරණයට ඉදිරිපත් කිරීමට නියමිතව තිබිණි.