විදේශීය සංචාරකයන්ගේ ජනප්‍රිය ගමනාන්තයක් වන කන්දකුලිය වෙරළ තීරයේ මුහුදු ඛාදනය මෑත කාලීන වර්ෂාව නිසා තවත් උග්‍ර වී තිබේ.

දේශීය සංචාරක ව්‍යාපාරයේ නිරතවන්නන් පැවසුවේ වෙරළ තීරයේ සුන්දරත්වය පසුගිය වසර 20 තුළ සංචාරකයන් විශාල සංඛ්‍යාවක් ආකර්ෂණය කර ගෙන ඇති අතර එමඟින් සැළකිව යුතු විදේශ විනිමයක් උපයා ඇති බවයි.

නමුත් මුහුදු ඛාදනය හේතුවෙන් කල්පිටිය අර්ධද්වීපයේ වෙරළ තීරයට සංචාරකයන්ගේ පැමිණීම අඩු වී ඇති අතර එහි සංචාරක හෝටල් සහ ආගන්තුකයන් සඳහා වන නිවාස 150ක් පමණ ඇත.

කයිට්සර්ෆිං ගැන උනන්දුවක් දක්වන විදේශීය සංචාරකයන් අතර මෙම ප්‍රදේශය ජනප්‍රියව පවතී.

හෝටල් හිමියන් පවසන්නේ ප්‍රදේශයේ සංචාරක ව්‍යාපාරය දියුණු කිරීමට ඔවුන් විශාල උත්සාහයක් ගත් නමුත් වෙරළ ඛාදනය ඔවුන්ගේ සිහින බිඳ දමා ඇති බවයි.

මේ නිසා හිරු බැස යෑම නැරඹීමට සහ අනෙකුත් ක්‍රියාකාරකම් සඳහා වෙරළට පැමිණෙන සංචාරකයන් සංඛ්‍යාව පහත වැටීඇති බව ද ඔවුන් ප්‍රකාශ කර තිබේ.

වෙරළ සංරක්ෂණය කිරීම සඳහා අර්ථවත් පියවර නොගැනීම සම්බන්ධයෙන් වගකිවයුතු නිලධාරීන්ට හෝටල් හිමියන් දොස් පවරන අතර, මේ සඳහා ඔවුන් ක්‍රියාකාරීව මැදිහත් වී පියවර ගත යුතු බව ද සඳහන් කර ඇත.

හෝටල් හිමියන්ගේ සංගමයේ සභාපති වසන්ත විතානගේ පැවසුවේ සංචාරකයන් ආකර්ෂණය කර ගැනීම සඳහා ඔවුන් පිරිසිදු වෙරළේ රූප ලොවට පෙන්වූ නමුත් සංචාරකයන් පැමිණ වෙරළට සිදුවී ඇති හානිය දුටු විට, ඔවුන් හෝටල් වෙන්කරවා ගැනීම් අවලංගු කර පිටත්ව ගිය බවයි.

“අපගේ වෙබ් අඩවිවල පළ කර ඇති කන්දකුලිය වෙරළේ ඡායාරූප දැන් අපි ඉවත් කරලා තියෙන්නේ, මන්ද ඡායාරූපවල දැක්වෙන සුන්දරත්වය මේ දිනවල දැකිය නොහැකි නිසා,” යැයි ඔහු පැවසීය.

වෙරළ සංරක්ෂණ දෙපාර්තමේන්තුවේ පුත්තලම කලාපය භාර සහකාර අධ්‍යක්ෂ මධුනි ප්‍රනාන්දු පැවසුවේ වෙරළ සංරක්ෂණය කිරීම සඳහා පියවර ගැනීමට සූදානම් වන බවයි.

මුහුදු රළ බිඳ දැමීම සඳහා මුහුදේ වැලි පිරවූ ගෝනි බාධක සෑදීමට හෝටල් හිමියන්ට උපදෙස් දී ඇති බව ඇය පැවසුවාය.

ඊට අමතරව, ගල් බාධක ඉදිකිරීමේ පිරිවැය පිළිබඳව ද ඔවුන් සාකච්ඡා කර තිබේ.

කල්පිටිය ප්‍රාදේශීය ලේකම් මංගල රාමනායක ද ඛාදනය නැවැත්වීමට කඩිනම් පියවර ගන්නා ලෙස ඉල්ලා සිටි අතර ඕනෑම ප්‍රමාදයක් වෙරළ අහිමි වීමට හේතු විය හැකි බවට අනතුරු ඇඟවීය.