මත්ද්‍රව්‍ය සම්බන්ධ වරදකට අත්අඩංගුවට ගැනුණු දකුණු ලන්ඩනයේ පදිංචි 21 හැවිරිදි චාලට් මේ ලී සිදුවීමට මුහුණදීම සඳහා උපරිමයෙන් උත්සාහ කරන බව ඇගේ නීතිඥ සම්පත් පෙරේරා ITV ප්‍රවෘත්ති වෙත පවසා තිබේ.

මැයි මාසයේදී කටුනායක ගුවන් තොටුපළේදී ඇය අත්අඩංගුවට ගනු ලැබුවේ ඇගේ ගමන් මල්ලේ තිබී කිලෝග්‍රෑම් 46ක කුෂ් මත්ද්‍රව්‍ය සොයා ගැනීමෙන් පසුවය.

රේගුව එය හඳුන්වන්නේ මෙතෙක් ඔවුන් විසින් අත්අඩංගුවට ගත් විශාලතම මත්ද්‍රව්‍ය තොගය ලෙසයි.

ලී තායිලන්තයේ සිට ගමන් පැමිණ තිබූ අතර, මත්ද්‍රව්‍ය ඇයගේ ගමන් මල්ලට දමා ඇති බව අවධාරණය කරයි.

ඇය වරදකරු වුවහොත් වසර 25ක සිර දඬුවමකට යටත් විය හැකිය.

ලීගේ නීතිඥ සම්පත් පෙරේරා පැවසුවේ ඇයගේ පවුලේ අය ඉතා සහයෝගයෙන් කටයුතු කරන බවත්, ඇය අත්අඩංගුවට ගැනීම සම්බන්ධයෙන් ඔවුන් විශාල වේදනාවකින් සිටින බවත්ය.

ලීට සහාය වීම පිළිබඳ විදේශ කාර්යාලයෙන් තමාට ආරංචියක් ලැබී නොමැති බව නීතිඥ පෙරේරා පැවසීය.

ලීගේ පවුල බ්‍රිතාන්‍ය රජය සමඟ සම්බන්ධ වී ඇත්දැයි ඔහු නොදනී..

සිකුරාදා ලී මීගමුව මහේස්ත්‍රාත් අධිකරණයට ඉදිරිපත් කර තිබිණි.

අධිකරණ වෛද්‍ය විශ්ලේෂණය ඇතුළු තීරණාත්මක සාක්ෂි තවමත් ඉදිරිපත් කර නොමැති බව එහිදී අධිකරණයට දැනුම් දී තිබේ.

ඒ අනුව ලීට විධිමත් ලෙස චෝදනා ගොනු කර නොමැත.

අධිකරණ වෛද්‍ය විශ්ලේෂණය ඇතුළු සියලුම වාර්තා අධිකරණයට ඉදිරිපත් කළ පසු පමණක් නීතිපති දෙපාර්තමේන්තුව මහාධිකරණයේ චෝදනා ගොනු කරනු ඇත.

විදේශගත සිරකරුවන් පිළිබඳ පුණ්‍යායතනයට අනුව, බ්‍රිතාන්‍ය ජනතාව සම්බන්ධ නව මත්ද්‍රව්‍ය නඩු ඉහළ ගොස් ඇති අතර, විශේෂයෙන් කාන්තාවන් සහ තරුණයන් පීඩාවට පත්ව තිබේ.

පසුගිය වසරේ නව මත්ද්‍රව්‍ය ආශ්‍රිත නඩු සඳහා කාන්තාවන් 62%ක් සහ තරුණයන් 65%ක් හසුව ඇති බව පුණ්‍යායතනය පැවසීය.

ලීගේ ඊළඟ නඩු විභාගය ජුනි 13 වැනි දින පැවැත්වීමට නියමිතය.