ශ්‍රී ලංකාවේ සිවිල් යුද්ධයේදී සියලු පාර්ශවයන් සාමය සඳහා සටන් කළ බවට ජනාධිපති අනුර කුමාර දිසානායක ජාතික රණවිරු දින සැමරුම අමතමින් සිදුකළ ප්‍රකාශය සමඟ තමා එකඟ නොවන බව හිටපු හමුදාපති ෆීල්ඩ් මාර්ෂල් සරත් ෆොන්සේකා පවසයි.

රූපවාහිනී සම්මුඛ සාකච්ඡාවකට එක්වෙමින් ජනාධිපතිවරයාගේ මතයට තමා එකඟ නොවන බවත්, එල්ටීටීඊ නායක ප්‍රභාකරන්ගේ ක්‍රියාමාර්ග සාමය සඳහා සිදුනොකළ බවත් ඔහු සඳහන් කළේය.

ප්‍රභාකරන් සාමය සඳහා සටන් කළේ නම්, ශ්‍රී මහා බෝධිය හෝ දළදා මාළිගාව වැනි පූජනීය ස්ථානවලට පහර නොදෙන බව ඔහු පෙන්වාදුන්නේය.

වැල්ලවත්තේ පැවැති සැමරුම් උත්සවය සම්බන්ධයෙන් ඔහු තවදුරටත් පැවසුවේ, උතුරේ සැමරුම් පැවැත්වීමට ඉඩදීම ගැන ද තමන් එකඟ නොවන බවයි.

මෙවැනි සැමරුම් මඟින් සටන්කාමීන්ට නැවත මතුවීමට අවස්ථා විවෘත කරන බව පැවසූ ඔහු, බලධාරීන් අවදියෙන් නොසිටින්නේ නම්, රට තුළ ත්‍රස්තවාදය නැවත ඇතිවීමට ඇති ඉඩකඩ වැඩි බවද පෙන්වාදුන්නේය.