බ්‍රිතාන්‍යයේ ඔටුන්න හිමි විලියම් කුමරු සහ රාජකීය පදනමේ වනජීවී වැඩසටහන ‘ගාඩියන්ස්’ නමින් වනජීවී ලෝකය පිළිබඳ නව රූපවාහිනී වැඩසටහන් මාලාවක් දියත් කිරීමට සැලසුම් කර තිබේ.

එම වැඩසටහන් පෙළ යටතේ ශ්‍රී ලංකාව පිළිබඳ කථාංගයක් 2025 ජුනි 20 වන සිකුරාදා නිකුත් කිරීමට නියමිතය.

ශ්‍රී ලංකාව පිළිබඳ වැඩසටහනේ දී අලි ඇතුන්, දිවියන් සහ අනෙකුත් වනජීවීන් පුනරුත්ථාපනය කිරීම සඳහා වෙහෙස නොබලා කටයුතු කරන, මුර සංචාර රාජකාරි කරන සහ මිනිස්-අලි ගැටුම් අවම කරන පශු වෛද්‍ය විශේෂඥයන් සම්බන්ධයෙන් ද ගෙනහැර දක්වනු ඇත.

මෙම වැඩසටහන් පෙළ මගින් රේන්ජර්වරුන් සහ සොබාදහමේ ආරක්ෂකයන් පිළිබඳ අවබෝධය නැවත අර්ථ දැක්වීමට උත්සාහ කරයි.

පෘථිවිය ආරක්ෂා කිරීම සඳහා ඔවුන් සිදුකරන වැදගත් නමුත් බොහෝදෙනා නොදකින කාර්යය පිළිගැනීම සහ ඇගයීම එමගින් සිදුකෙරේ.

ගාඩියන්ස් මැයි 23 වන සිකුරාදා සිට BBC Earth යූ ටියුබ් සහ සමාජ නාලිකාවල නිකුත් කෙරෙන අතර, සෑම සතියකම ආකර්ෂණීය නව කථාංගයක් දියත් කෙරේ.

මිනිත්තු 6-10ක සෑම කථාංගයක්ම රේන්ජර්වරුන් සහ සොබාදහමේ ආරක්ෂකයන් ජෛව විවිධත්වය සහ පරිසර පද්ධති සංරක්ෂණය කිරීමට කටයුතු කරන විට ඔවුන් මුහුණ දෙන අත්දැකීම් සහ ඔවුන්ගේ ජීවිත පිළිබඳ සුවිශේෂී ප්‍රවේශයක් ලබා දෙයි.

විලියම් කුමරුගේ සංකල්පයක් වූ මෙම කතා මාලාව, ට්‍රේලරය සහ කථාංග හැඳින්වීම් සඳහා ඔහුම හඬ කවා තිබේ.

හිමාලයේ හිම කඳුකරයේ සිට බ්‍රසීලයේ දුරස්ථ වැසි වනාන්තර දක්වා, කතා මාලාව සොබාදහමේ ආරක්ෂකයන්ගේ නිවහන ලෙස හඳුන්වන වඩාත් විශ්මයජනක නමුත් අභියෝගාත්මක ස්ථාන කිහිපයක රූගත කර ඇති අතර, සෑම කථාංගයක්ම මෙම ආශ්වාදජනක පුද්ගලයන්ගේ වැදගත් භූමිකාව ඉස්මතු කරයි.