ලිංගිකව සම්ප්‍රේෂණය වන ගොනෝරියා ආසාදනයට එරෙහිව එන්නත් කිරීම ආරම්භ කළ ලොව පළමු රට බවට පත්වීමට එංගලන්තය සූදානම් වේ.

කෙසේවෙතත් එම එන්නත සෑම කෙනෙකුටම ලබාගත නොහැකි වනු ඇති බව වාර්තා වේ.

බහු ලිංගික සහකරුවන් ඇසුරු කළ හෝ ලිංගාශ්‍රිත රෝග පිළිබඳ ඉතිහාසයක් ඇති පුද්ගලයන් කෙරෙහි එන්නත් දීමේදී ප්‍රධාන වශයෙන් අවධානය යොමු කෙරේ.

එන්නත ඵලදායී වන්නේ 30-40%ක් වුවත් එංගලන්ත සෞඛ්‍ය අංශ බලාපොරොත්තු වන්නේ එය ඉහළ යන ආසාදන සංඛ්‍යාව අඩු කරනු ඇති බවයි.

1918 දී ආසාදනය වාර්තා වීම ආරම්භ වූ දා සිට රෝගීන් වාර්තා වී ඇති අතර 2023 දී රෝගීන් 85,000කට වඩා වැඩි සංඛ්‍යාවක් වාර්තා වී ඇත්තේ එරටින් එම රෝගීන් වාර්තා වූ වැඩිම වසර ලෙසය.

ගොනෝරියා සෑම විටම රෝග ලක්ෂණ නොපෙන්වයි.

වේදනාව, අසාමාන්‍ය ශ්‍රාවය, ලිංගික අවයවවල දැවිල්ල සහ වඳභාවය එම ලක්ෂණවලට ඇතුළත් විය හැකිය.

කෙසේවෙතත් කොපමණ පිරිසක් ප්‍රතිශක්තිකරණය කිරීමට තෝරා ගනීද යන්න අවිනිශ්චිතය.

එන්නත දීම අගෝස්තු මාසයේදී ආරම්භ වන අතර ලිංගික සෞඛ්‍ය සේවා හරහා ලබා දෙනු ඇත.

මෙම එන්නත ගොනෝරියා සඳහා නිර්මාණය කර නැත.

එය දැනට ළදරුවන්ට ලබා දෙන මෙනින්ජයිටිස් බී එන්නතයි.

නමුත් රෝග දෙකට හේතු වන බැක්ටීරියා ඉතා සමීපව සම්බන්ධ වන අබැවින් මෙම එන්නත ගොනෝරියා රෝගීන් තුනෙන් එකකින් පමණ අඩු කරන බව පෙනීගොස් තිබේ.

බ්‍රිතාන්‍ය ලිංගික සෞඛ්‍ය සහ HIV සංගමයේ සභාපති මහාචාර්ය මැට් ෆිලිප්ස් පවසන්නේ මෙය එංගලන්තයේ ලිංගික සෞඛ්‍යය සඳහා විශිෂ්ට පුවතක් සහ සන්ධිස්ථානීය මොහොතක් බවයි.