පවතින ලුණු හිඟයට විසඳුමක් ලෙස ඉන්දියාවෙන් ආනයනය කරන ලද ලුණු තොගයක් අද රාත්‍රියේ ශ්‍රී ලංකාවට පැමිණීමට නියමිත බව වෙළඳ, වාණිජ හා ආහාර සුරක්ෂිතතා අමාත්‍ය වසන්ත සමරසිංහ පැවසීය.

ඒ අනුව ලුණු මෙට්‍රික් ටොන් 3,050 ක තොගයක් අද රාත්‍රියේ (මැයි 21) මෙරටට ගෙන ඒමට නියමිතය.

මෙම තොගයට පෞද්ගලික අංශයෙන් ආනයනය කරන ලද ලුණු මෙට්‍රික් ටොන් 250 ක් සහ ජාතික ලුණු සමාගම විසින් ආනයනය කරන ලද ලුණු මෙට්‍රික් ටොන් 2,800 ක් ඇතුළත් බව වාර්තා වේ.

රටේ මාසික ලුණු අවශ්‍යතාවය මෙට්‍රික් ටොන් 15,000 ක් වන අතර වාර්ෂික අවශ්‍යතාවය ලුණු මෙට්‍රික් ටොන් 180,000 කි.

ශ්‍රී ලංකාව යල සහ මහ කන්න දෙකකදී ලුණු අස්වැන්න නෙළාගනී.

යල කන්නයේ අස්වැන්න පෙබරවාරි මැද සිට අප්‍රේල් මැද දක්වා වන අතර මහ කන්නයේ අස්වැන්න ජුනි මැද සිට ඔක්තෝබර් මැද දක්වා වේ.

කෙසේවෙතත්, අධික වර්ෂාව හේතුවෙන්, පසුගිය වසරේ යල සහ මහ කන්නවලදී අපේක්ෂිත ලුණු අස්වැන්න ලබාගැනීමට නොහැකි වූ අතර, එමඟින් රටේ අවශ්‍යතා සපුරාලීම සඳහා ලුණු ආනයනය කිරීමට සිදුවිය.