1979 අංක 48 දරන ත්‍රස්තවාදය වැළැක්වීමේ (තාවකාලික විධිවිධාන) පනත වෙනුවට ත්‍රස්තවාදයට එරෙහි නව පනත් කෙටුම්පත සඳහා මහජනතාවගෙන් අදහස් ඉල්ලා සිටින බව අධිකරණ හා ජාතික ඒකාබද්ධතා අමාත්‍යාංශය කියයි.

“නව පනත් කෙටුම්පතක් හඳුන්වාදීමේ අරමුණ වන්නේ නූතන ගෝලීය ත්‍රස්තවාදයේ අභියෝගවලට මුහුණ දීම, දේශීය හා විදේශීය වශයෙන් පුද්ගලයන්ගේ මානව හිමිකම්වලට අනුකූල වීම සහ අන්තර්ජාතිකව පිළිගත් ප්‍රමිතීන්ට අනුකූල වීමයි,” යනුවෙන් අමාත්‍යාංශය මාධ්‍ය වෙත නිවේදනයක් නිකුත් කරමින් කියා සිටියේය.

ඒ අනුව, මහජන අදහස්, නිර්දේශ සහ යෝජනා මැයි 16 වැනි දින සිට දින 14ක් ඇතුළත ලියුම් කවරයේ වම් කෙළවරේ ‘ත්‍රස්තවාදයට එරෙහි පනත් කෙටුම්පත සඳහා යෝජනා’ යනුවෙන් සඳහන් කරමින් අධිකරණ හා ජාතික ඒකාබද්ධතා අමාත්‍යාංශයේ ලේකම් වෙත යොමු කරන ලෙස ඉල්ලා සිටී.

සියලුම ලිපි අංක 19, ශ්‍රී සංඝරාජ මාවත, කොළඹ 10 හෝ legal@moj.gov.lk විද්‍යුත් තැපැල් ලිපිනයට යොමු කරන ලෙස අධිකරණ හා ජාතික ඒකාබද්ධතා අමාත්‍යාංශය ඉල්ලා සිටී.

අධිකරණ හා ජාතික ඒකාබද්ධතා අමාත්‍ය හර්ෂණ නානායක්කාර මීට පෙර පැවසුවේ එම මතභේදාත්මක නීති කෙටුම්පත අවලංගු කිරීමේ අරමුණින් නව නීතිය හඳුන්වා දෙන බවයි.

නව නීතිය හඳුන්වා දෙන තුරු ත්‍රස්තවාදය වැළැක්වීමේ පනත අවලංගු නොකරන බව ඔහු පැවසීය.

අවලංගු කිරීමට නියමිත ත්‍රස්තවාදය වැළැක්වීමේ පනත සමාලෝචනය කර නව නීතියක් ගෙන ඒම සඳහා ජනාධිපති නීතිඥ රියන්සි අර්සකුලරත්නගේ ප්‍රධානත්වයෙන් 17 දෙනෙකුගෙන් යුත් කමිටුවක් පෙබරවාරි 19 වැනි දින පත් කරන ලදී.