ශ්‍රී ලංකාවේ දශක තුනක් පුරා පැවති සිවිල් යුද්ධය අවසන් වී අදට (18) වසර 16 ක් සපිරේ.

2009 මැයි 18 වැනි දින නන්දිකඩාල් කලපුවේදී ශ්‍රී ලංකා ආරක්ෂක හමුදා විසින් සන්නද්ධ බෙදුම්වාදී කණ්ඩායමක් වන දෙමළ ඊලාම් විමුක්ති කොටි (LTTE) හි නායක වේලුපිල්ලේ ප්‍රභාකරන් ඝාතනය කිරීමත් සමඟ යුද්ධය අවසන් විය.

මෙම දිනය වසර තිහකට වැඩි කාලයක් රට තුළ යුද්ධ කළ ත්‍රස්තවාදී කණ්ඩායමක් වන LTTE හි පරාජය සිහිපත් කරයි.

ශ්‍රී ලංකාවේ සන්නද්ධ හමුදා විසින් ප්‍රභාකරන් සහ ඔහුගේ ත්‍රස්ත සංවිධානය මුලිනුපුටා දැමීමත් සමඟ කුරිරු ගැටුම අවසන් විය.

යුද්ධය අවසන් කිරීමට අමතරව, රටේ ආරක්ෂක හමුදා විසින් ලොව විශාලතම මානුෂීය මෙහෙයුම ලෙස සැළකෙන මෙහෙයුම සිදුකළ අතර, LTTE විසින් ප්‍රාණඇපකරුවන් ලෙස රඳවාගෙන සිටි දහස් ගණනක් සිවිල් වැසියන් බේරාගන්නා ලදී.

යුද්ධය අවසන් වී වසර 16 ක් සනිටුහන් කිරීම සඳහා පැවැත්වෙන ජාතික රණවිරු දිනය හෙවත් විජයග්‍රාහී දිනය හෙට, මැයි 19 වැනි දින පස්වරු 4:00 සිට පස්වරු 6:00 දක්වා ශ්‍රී ජයවර්ධනපුර කෝට්ටේ ජාතික රණවිරු ස්මාරකයේදී පැවැත්වීමට නියමිතය.

මෙම උත්සවය නියෝජ්‍ය ආරක්ෂක අමාත්‍ය විශ්‍රාමික මේජර් ජෙනරාල් අරුණ ජයසේකරගේ ප්‍රධානත්වයෙන් පැවැත්වේ.

යුද්ධයේ අවසන් අදියරේදී ත්‍රිවිධ හමුදාවට නායකත්වය දුන් ෆීල්ඩ් මාර්ෂල් සරත් ෆොන්සේකා, ෆ්ලීට් අද්මිරාල් සහ හිටපු නාවික හමුදාපති වසන්ත කරන්නාගොඩ සහ ගුවන් හමුදාවේ මාර්ෂල් රොෂාන් ගුණතිලක යන මහත්වරුන් ඇතුළු සම්භාවනීය අමුත්තෝ පිරිසක් ඊට එක්වෙති.