ශ්‍රී ලංකාවේ වර්තමාන විදේශ ණය ප්‍රතිව්‍යුහගතකරණය කිරීමේ ක්‍රියාවලිය සම්බන්ධයෙන් ශ්‍රී ලංකාව සහ ඉන්දියාව ඇමරිකානු ඩොලර් මිලියන 930.8 ක ණය ප්‍රතිව්‍යුහගතකරණය කිරීමේ ගිවිසුමකට අත්සන් තබා ඇත.

ශ්‍රී ලංකා රජය සහ ඉන්දියාවේ අපනයන-ආනයන බැංකුව (EXIM) අතර ද්විපාර්ශ්වික සංශෝධන ගිවිසුම් අත්සන් කිරීම පිළිවෙලින් 2025 මාර්තු 25 සහ 2025 අප්‍රේල් 03 යන දිනවල සිදුව තිබේ.

මෙම ගනුදෙනුව ඉන්දීය රජය සමඟ ණය රේඛා 07 ක් සහ ගැනුම්කරුගේ ණය පහසුකම් ගිවිසුම් 04 ක් සමග සම්බන්ධ වේ.

ශ්‍රී ලංකා රජය වෙනුවෙන් මුදල්, සැලසුම් සහ ආර්ථික සංවර්ධන අමාත්‍යාංශයේ ලේකම් කේ.එම්. මහින්ද සිරිවර්ධන ගිවිසුම් අත්සන් කළේය.

ඉන්දියානු EXIM බැංකුවේ සාමාන්‍යාධිකාරී නිර්මිත් වෙඩ් ණය රේඛා ගිවිසුමට අත්සන් තැබූ අතර, ඉන්දියානු EXIM බැංකුවේ නියෝජ්‍ය සාමාන්‍යාධිකාරී අමිත් කුමාර් ගැනුම්කරුගේ ණය ගිවිසුම් අත්සන් කළේය.

ප්‍රංශය සහ ජපානය සමඟ නිල ණයහිමි කමිටුවේ සමසභාපතිත්වය දරන ඉන්දීය රජය, ශ්‍රී ලංකාවේ විදේශ ණය ප්‍රතිව්‍යුහගතකරණය කිරීමේ ක්‍රියාවලියට නායකත්වය දීමේදී තීරණාත්මක කාර්යභාරයක් ඉටුකර ඇත.

ද්විපාර්ශ්වික සංශෝධන ගිවිසුම් අවසන් කිරීම ඉන්දීය සහ ශ්‍රී ලංකා රජයන් අතර ගැඹුරු සහ දිගුකාලීන ද්විපාර්ශ්වික සබඳතා තවදුරටත් වර්ධනය කිරීමට මගපාදනු ඇතැයි අපේක්ෂා කෙරේ.