හදිසි අනතුරුවලින් සිදුවන උකුල් ඇට බිඳීයෑම්වලදී බද්ධ කිරීම සඳහා මෙයට වසර දහයකටත් එපිට කාලකදී ආනයනය කරන ලද කෘත්‍රිම උකුල් ඇට තොගයක් වසර දහයකට වැඩි කාලයක් එය ප්‍රමිතියට නොමැති නිසා භාවිත කිරීමට නොහැකිව වෛද්‍ය සැපයුම් අංශයේ පළමු මහලේ ෆෝක් ලිෆ්ට් යන්ත්‍ර ක්‍රියාකරුවන්ගේ විවේක කාමරය ඉදිරිපස කොටසේ ලී පෙට්ටි දෙකක අසුරා ගබඩා කර සඟවා තිබෙන බව Voice of Sri Lanka වෙබ් අඩවිය වාර්තා කරයි.

එම වාර්තාවට අනුව, මෙම උපකරන කුමණ රටකින් ,කුමන කාලයක කවුරුන් විසින් ආනයනය කළේද යන්න සම්බන්ධයෙන් කිසිදු තොරතුරක් නොමැති අතර ඊට අදාළ ලිපි ලේඛණ මේ වන විට විනාශ කර දමා ඇත.

මෙරට ජනතාවට ශරීර ප්‍රමාණයට සරිලන උකුල් ඇට ආසියාතික රටවලට නිපදවන ඒවා වියයුතු වුවත්, එසේ ආනයනය කර ඇති ඒවා ප්‍රමාණයෙන් විශාල නිසා මෙරටදී භාවිත කිරිමට නොහැකි බව සදහන් වේ.

ඉතා මිල අධික ලෝහයක් වන ටයිටෙනියම්වලින් නිපදවා ඇති ඒවා එම පෙට්ටි දෙකේ තුන්සියකට වැඩි ප්‍රමාණයක් ඇති බව විශ්වාස කෙරෙයි.

මෙම උකුල් ඇට අද සෞඛ්‍ය අමාත්‍යංශයේ වෛද්‍ය සැපයුම් අංශයේ ප්‍රධාන සහකාර අධ්‍යක්ෂවරයෙකු ලෙස කටයුතු කරන පුද්ගලයකු, එකල ගබඩා පාලකවරයකු ලෙස කටයුතු කරන සමයේදී ඇනවුම් කර ඇති බව පැවැසේ.

ඒවා පැමිණි අවස්ථාවේදීම ඒවාට අදාළ ලියකියවිලි සමග පරික්ෂා කර බලා ප්‍රමිතියට නොගැලපේ නම් ප්‍රතික්ෂේප කළ හැකිව තිබුණත්, ඒ වෙනුවට එවකට එම ගබඩාවේ ප්‍රධාන ගබඩා පාලක වූ, වත්මන් සහකාර අධ්‍යක්ෂවරයකු විසින් සිදුකර ඇත්තේ එම ලියකියවිලි විනාශ කර දමා උකුල් ඇට තොගය මෙසේ සඟවා සිදුවීම යටගසා දැමීමයි.

වරින්වර මේ පිළිබඳ ඉස්මතු වන විටදීද අදාළ සහකාර අධ්‍යක්ෂ වරයා විසින් මේ උකුල් ඇට තොගය වෙනත් ගබඩාවල සැඟවීමට උත්සාහ දරන බවත් වාර්ථා වේ.