කොළඹ වරායේ ජයබහලු පර්යන්තයේ සහ නැගෙනහිර බහාලුම් පර්යන්තයේ සේවකයන් ඊයේ රාත්‍රියේ සිදුකළ පැය හතරක වැඩවර්ජනයක් හේතුවෙන් සිදුවූ පාඩුව අවම වශයෙන් රුපියල් මිලියන 300ක් පමණ වන බව ශ්‍රී ලංකා වරාය අධිකාරිය පවසයි.

ඊයේ රාත්‍රී 8.00 ට ආරම්භ වූ මෙම වර්ජනය මධ්‍යම රාත්‍රිය දක්වා ක්‍රියාත්මක වූයේ අප්‍රේල් 12 සහ 13 යන දිනවල සේවය කළ අත්‍යාවශ්‍ය සේවකයන්ට වෙසක් පෝය නිවාඩුවට සමගාමීව සිදුකරන දිරිදීමනා කපාහැරීමට වරාය අධිකාරිය ගත් ආන්දෝලනාත්මක තීරණයක් හේතුවෙනි.

කෙසේවෙතත්, ශ්‍රී ලංකා වරාය අධිකාරියේ පාලනාධිකාරිය විසින් අතිකාල දීමනා පෙර ක්‍රමයට ලබාදෙන බවට සහතික වූ ලිපියක් නැවත නිකුත් කිරීමෙන් පසු අද අලුයම 12.30 ට පමණ සේවකයන් යළි රාජකාරි ආරම්භ ක‍ර තිබේ.

වැඩවර්ජනය ආරම්භ වන විට භාණ්ඩ ප්‍රවාහන නෞකා හයක් සේවක වර්ජනය ක්‍රියාත්මක වූ පර්යන්තවල නැංගුරම් ලා තිබූ අතර, වර්ජනය හේතුවෙන් ඒවායේ සියලු මෙහෙයුම් සම්පූර්ණයෙන්ම නතර කර තිබිණි.

එම ආරවුල පැනනගින්නේ ශ්‍රී ලංකා වරාය අධිකාරියේ ජ්‍යෙෂ්ඨ නිලධාරියකු විසින් පොහොය දිනයේ රාජකාරී සඳහා අතිකාල දීමනා ලෙස රුපියල් 10,000 සහ පසු දින රාජකාරි සඳහා රුපියල් 5,000 ක් ලෙස සීමාකිරීමට ගත් තීරණයක් හේතුවෙනි

මෙම පියවර අත්‍යවශ්‍ය සේවකයන් සඳහා නිවාඩු දීමනා සම්බන්ධ දිගුකාලීන භාවිතයන් උල්ලංඝණය කිරීමක් බවට සේවකයෝ පැවසූහ.

සේවක වැටුප් සම්බන්ධයෙන් මීට පෙර ජනමාධ්‍ය වෙත ප්‍රකාශ කිරීම සම්බන්ධයෙන් විවේචනයට ලක්වූ ජ්‍යෙෂ්ඨ පරිපාලකයෙකු විසින් ඒකපාර්ශ්විකව මෙම තීරණ ගෙන ඇති බවට චෝදනා එල්ල වේ.