May 4, 2025
ජපානයේ ආරක්ෂක අමාත්‍ය ජෙනරාල් නකටානි අද දින අරලියගහ මන්දිරයේදී ශ්‍රී ලංකා අග්‍රාමාත්‍ය ආචාර්ය හරිනි අමරසූරිය හමුවිය.
දිගුකාලීන ද්විපාර්ශ්වික මිත්‍රත්වය තුළ මෙම සාකච්ඡාව සිදුවූ අතර, විශේෂයෙන් ආරක්ෂක සහ කලාපීය ආරක්ෂාව යන ක්ෂේත්‍රවල ජපානය සහ ශ්‍රී ලංකාව අතර සහයෝගීතාව ශක්තිමත් කිරීම කෙරෙහි අවධානය යොමුවිය.
ජපාන රජය වෙනුවෙන් අමාත්‍ය නකටානි අග්‍රාමාත්‍යවරියට සිය සුබ පැතුම් එක් කළ අතර, ඉන්දු-පැසිෆික් කලාපය පුරා සාමය සහ ස්ථාවරත්වය සහතික කිරීම සඳහා සහයෝගී උත්සාහයන් සඳහා ජපානයේ කැපවීම නැවත තහවුරු කළේය.
සමුද්‍රීය ආරක්ෂාව සහ කලාපීය සම්බන්ධතාවයේ දී ශ්‍රී ලංකාවේ උපායමාර්ගික වැදගත්කම ද ඔහු අවධාරණය කළේය.
සංවර්ධන හවුල්කාරිත්වයන් හරහා, විශේෂයෙන් ජපන් ජාත්‍යන්තර සහයෝගීතා ඒජන්සිය (JICA) හරහා ජපානයේ අඛණ්ඩ සහයෝගය සඳහා අග්‍රාමාත්‍ය අමරසූරිය මෙහිදී කෘතඥතාව පළකළාය.
විනිවිදභාවය, ආර්ථික ප්‍රතිසංස්කරණ සහ ජාතික පරිවර්තනය සඳහා රජයේ කැපවීම ඇය නැවත අවධාරණය කළාය.
දේශගුණික ප්‍රතිචාර, මානුෂීය ආධාර සහ සමුද්‍රීය ආරක්ෂාව වැනි වගකීම් ඇතුළත් කිරීම සඳහා ශ්‍රී ලංකාවේ ආරක්ෂක හමුදාවන්ගේ කාර්යභාරය පරිණාමය කිරීම සඳහා රජයේ දැක්ම ද අග්‍රාමාත්‍යවරිය මෙහිදී පෙන්වාදුන්නාය.
මෙම රැස්වීමේදී වෙළඳාම, ආයෝජන සහ සංචාරක ක්ෂේත්‍රයේ අවස්ථා තවදුරටත් ගවේෂණය කරන ලද අතර, ප්‍රධාන අංශ පහක් හරහා සම්බන්ධතාවය ගැඹුරු කිරීමට දෙපාර්ශ්වයම එකඟ විය.
ශ්‍රී ලංකාවේ ජපාන තානාපති අතිගරු අකියෝ ඉසෝමාටා සහ දෙරටේ රජයන්හි ජ්‍යෙෂ්ඨ නිලධාරීහු මෙම රැස්වීමට සහභාගී වූහ.
