දෙස් විදෙස් බැතිමතුන්ට අභිමානයෙන් හා නිසි පහසුකම් සහිතව දළදා සමිඳුන් වැඳපුදා ගැනීමට අවශ්‍ය සියලු කටයුතු සූදානම් කර ඇති බව බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි පවසයි.

අමාත්‍යවරයා මේ බව ප්‍රකාශ කළේ, එළඹෙන ‘සිරි දළදා වන්දනා’ විශේෂ ප්‍රදර්ශනය පිළිබඳව ජනතාව දැනුවත් කිරීමේ අරමුණින් අද රජයේ ප්‍රවෘත්ති දෙපාර්තමේන්තුවේ පැවැති ජනමාධ්‍ය හමුවකදීය.

මෙම විශේෂ දළදා ප්‍රදර්ශනය අප්‍රේල් 18 සිට අප්‍රේල් 28 දක්වා දින දහයක් පුරා පැවැත්වීමට නියමිතය.

මෙම වැඩපිළිවෙළ පිළිබඳව අදහස් දක්වමින් මහනුවර අතිරේක දිස්ත්‍රික් ලේකම් ලලිත් ඇටම්පාවල පැහැදිලි කළේ, මහජනතාව සඳහා වෙනම පෝලිම් තුනක් ස්ථාපිත කිරීමට සැලසුම් කර ඇති බවයි.

ඉන් පෝලිම් දෙකක් නුවර වැව වටා වන අතර තෙවැන්න ඩී.එස්.සේනානායක වීදිය ඔස්සේ පෙළ ගැස්සවීමට අපේක්ෂා කරයි.

මාර්ගස්ථ මගී ප්‍රවාහන අධිකාරිය, ශ්‍රී ලංකා ගමනාගමන මණ්ඩලය සහ දුම්රිය දෙපාර්තමේන්තුව ඒකාබද්ධව විශේෂ ප්‍රවාහන වැඩසටහනක් ක්‍රියාත්මක කර ඇති බවද ඔහු වැඩිදුරටත් පැවසීය.

ඊට අමතරව, වාහන විශාල සංඛ්‍යාවක් නගරයට ඇතුළු වුවහොත්, නගරයට ඇතුළු වීමට පෙර ඒවා නවත්වන අතර, මිනිසුන් ප්‍රවාහනය සඳහා විශේෂ බස් රථ භාවිත කරන බව ද ඔහු පැවැසීය.

ආබාධිත සහ වැඩිහිටි පුද්ගලයන්ගේ පහසුව සඳහා කැප්පිටිපොල මහා විද්‍යාලය සහ විවේකානන්ද විද්‍යාලය නවාතැන් සඳහා සූදානම් කර ඇත.

මේ අතර පොලිස් අධිකාරී ඩී.සී.ඩී. ඉලංගකෝන් ද අදහස් දක්වමින් පැවසුවේ, ශ්‍රී දළදා සමිඳුන් උදෙසා පූජා කෙරෙන දෑ පමණක් පරිශ්‍රය තුළට රැගෙන යෑමට අවසර දෙන බවයි.

ජංගම දුරකථන තහනම් කර නොමැති අතර, ඒවා ක්‍රියා විරහිත කර තැබිය යුතු බවත්, ඡායාරූප ගැනීමට ඉඩ නොදෙන බවත් ඔහු වැඩිදුරටත් පැහැදිලි කළේය.

පෙරවරු 7.30 සිට පස්වරු 2.00 දක්වා පැවැත්වෙන විශේෂ ප්‍රදර්ශනයේදී 35,000කට පමණ රාත්‍රී ආහාරය ලබාදීමට ද මහනුවර ශ්‍රී දළදා මාලිගාව කටයුතු සූදානම් කරමින් පවතී.