රුපියල් බිලියන 3කට අධික ආයෝජනයකින් ඉදිකරන ලද ශ්‍රී ලංකාවේ ප්‍රථම ඉන්සියුලින් නිෂ්පාදන කම්හල 2027 වසරේදී නිෂ්පාදන කටයුතු ආරම්භ කිරීමට අපේක්ෂා කරන බව සෞඛ්‍ය අමාත්‍යාංශය පවසයි.

‘ප්‍රිමියම් ඉන්ටර්නැෂනල් ඉන්ජෙක්ටබල් (පෞද්ගලික) සමාගම’ විසින් පාලනය කරනු ලබන මෙම කම්හල ගාල්ල, කොග්ගල අපනයන සැකසුම් කලාපයේ පිහිටා ඇත.

අමාත්‍යාංශයට අනුව, පහසුකමේ ඉදිකිරීම් කටයුතු අවසන් කර ඇති අතර, අවශ්‍ය තහවුරු කිරීමේ ක්‍රියාවලිය අවසන් වීමෙන් පසු ලබන වසරේ නිෂ්පාදන කටයුතු ආරම්භ කිරීමට නියමිතය.

ඉන්සියුලින්වලට අමතරව මෙම කම්හල තුළ නිර්වින්දන ඖෂධ, වේදනා නාශක සහ වෙනත් ඖෂධ නිෂ්පාදනය කිරීමට සැලසුම් කර ඇති අතර, අවසානයේදී ඖෂධ වර්ග 33ක් දක්වා නිෂ්පාදන පුළුල් කිරීමට අපේක්ෂා කෙරේ.

ඉකුත් දා මෙම කර්මාන්තශාලාව නිරීක්ෂණය කළ සෞඛ්‍ය සහ ජනමාධ්‍ය අමාත්‍ය වෛද්‍ය නලින්ද ජයතිස්ස සඳහන් කළේ, ඖෂධ ආනයනය මත යැපීම අඩු කිරීම සහ දේශීය නිෂ්පාදන ශක්තිමත් කිරීම ඉදිරි දශකය තුළ ප්‍රධාන රජයේ ප්‍රමුඛතාව වනු ඇති බවයි.

ශ්‍රී ලංකාව දැනට සිය රෝහල් පද්ධතියට අවශ්‍ය ඖෂධ වලින් සියයට 85-90 අතර ප්‍රමාණයක් ආනයනය කරන බවත්, දේශීයව නිෂ්පාදනය කරනු ලබන්නේ සියයට 10-15 අතර ප්‍රමාණයක් පමණක් බවත් අමාත්‍යවරයා එහිදී පැවසුවේය.

සැපයුම්කරුවන් නොමැතිකම හේතුවෙන් ඖෂධ වර්ග 37ක් සඳහා ප්‍රසම්පාදන දුෂ්කරතා පවතින නමුත්, රජය විසින් රෝහල්වල ඖෂධ සැපයුම් අවශ්‍යතාවලින් ආසන්න වශයෙන් සියයට 96ක් සපුරා ගැනීමට සමත්ව ඇති බව ඔහු වැඩිදුරටත් ප්‍රකාශ කළේය.

දේශීය ඖෂධ නිෂ්පාදනය පුළුල් කිරීම මඟින් ආනයන සඳහා වැය වන විදේශ විනිමය ඉතිරි කර ගැනීමටත්, අපනයන ආදායම් උත්පාදනය කිරීමට අවස්ථා නිර්මාණය කර ගැනීමටත් හැකි වන බව ද අමාත්‍යවරයා එහිදී සඳහන් කළේය.

එමෙන්ම ඔහු පෙන්වා දුන්නේ රාජ්‍ය ඖෂධ නිෂ්පාදන සංස්ථාව හරහා මාලදිවයිනට ඖෂධ සැපයීම සඳහා සාකච්ඡා පැවැත්වෙන බව සහ වෙනත් රටවලින් ද ඉල්ලීම් ලැබී ඇති බවයි.

මෙම නව ඉන්සියුලින් නිෂ්පාදන කම්හල, රාජ්‍ය ඖෂධ නීතිගත සංස්ථාව සමඟ ඒකාබද්ධ ව්‍යාපාරයක් ලෙස පිහිටුවනු ලබන අතර, දැනටමත් වසර 15ක ඖෂධ සැපයුම් ගිවිසුමකට එළඹ තිබේ.

අමාත්‍යාංශයට අනුව, දේශීය ඉල්ලුම සපුරාලීමෙන් පසු සිය නිෂ්පාදන අපනයනය කිරීමට ද සමාගම අදහස් කරයි.