රටවල් 15ක පමණ ශ්‍රී ලංකා තානාපතිවරුන්ගේ ගෘහ කාර්ය මණ්ඩලයට ශ්‍රී ලංකාව විසින් ගෙවනු ලබන්නේ එම සත්කාරක රටවල අවම වැටුපට වඩා අඩුවෙන් බව පෙනීගොස් තිබේ.

තොරතුරු දැනගැනීමේ අයිතිය පිළිබඳ ඉල්ලීමකට ලැබුණු ප්‍රතිචාරවලින් හෙළි වූයේ 2024 ජනවාරි සිට දෙසැම්බර් දක්වා කළමනාකරණ සේවා දෙපාර්තමේන්තුව විසින් අනුමත කරන ලද ‘සේවා සහායකයන්’ සඳහා වන වැටුප් ස්ථානය අනුව මසකට අමෙරිකානු ඩොලර් 253 සිට ඇමරිකානු ඩොලර් 872 දක්වා පරාසයක පවතින බවයි.

මෙම කාර්ය මණ්ඩලය නියමිත කාලයෙන් අඩකට වඩා අඩු කාලයක් (සතියකට පැය 20) සේවය කර නොමැති නම්, ජර්මනිය, ප්‍රංශය, කැනඩාව, අමෙරිකා එක්සත් ජනපදය සහ පෝලන්තය වැනි සත්කාරක රටවල ඔවුන්ට නීත්‍යනුකූල අවම වැටුප ගෙවිය නොහැකි වේ.

පසුගිය වසරේ ඉහළ පෙළේ අධිකරණ නඩුවකදී, ඕස්ට්‍රේලියානු ෆෙඩරල් අධිකරණයක් විසින් ශ්‍රී ලංකා රාජ්‍ය තාන්ත්‍රිකයකුට ඕස්ට්‍රේලියානු අවම වැටුප් ප්‍රමිතීන්ට අනුව සහ පාර්ශවයන් අතර එකඟ වූ මුදල අනුව තම ගෘහ සේවිකාවට නොගෙවූ වැටුප් වශයෙන් ඕස්ට්‍රේලියානු ඩොලර් 500,000කට වැඩි මුදලක් සහ දඩ වශයෙන් ඕස්ට්‍රේලියානු ඩොලර් 100,000කට වැඩි මුදලක් ගෙවීමට නියෝග කරන ලදී.

විදේශ අමාත්‍ය විජිත හේරත් පසුව එම රාජ්‍ය තාන්ත්‍රිකයා ආරක්ෂා කරමින් කියා සිටියේ ශ්‍රී ලංකා රජය විසින් වැටුප් තීරණය කරනු ලබන්නේ ශ්‍රී ලංකා වැටුප් ප්‍රමිතීන්ට අනුකූලව බවත්, අනාගතයේදී එවැනි ගැටලු වළක්වා ගැනීම සඳහා ප්‍රතිපත්තිමය තීරණයක් ගත යුතු බවත්ය.

කෙසේවෙතත්, අභ්‍යන්තර ආරංචි මාර්ග හෙළි කළේ මෙතෙක් නව ප්‍රතිපත්තියක් ක්‍රියාත්මක කර නොමැති අතර වැටුප් එලෙසම පවතින බවයි.

මෙම ගැටලුව මඟ හැරීම සඳහා, සමහර රාජ්‍ය තාන්ත්‍රිකයන් ගෘහ සේවිකාවන් නොමැතිව තනතුරු ලබා ගන්නා අතර තවත් සමහරු මෙය ගැටලුවක් වන රටවලට නොයෑමට තෝරා ගන්නා බව ද වාර්තා වේ.

සමහර දූත මණ්ඩලවල ලිපිකරු කාර්ය මණ්ඩලයට පවා සත්කාරක රටවල අවම වැටුපට වඩා අඩු වැටුපක් ගෙවනු ලබන බව පැවසේ.

එම සත්කාරක රටවල් රාජ්‍ය තාන්ත්‍රික කටයුතුවලට මැදිහත් නොවන බැවින් එය ගැටලුවක් බවට පත් නොවන බව අභ්‍යන්තර ආරංචි මාර්ග පෙන්වා දුන්නේය.

ඉන්දියානු සහ අමෙරිකානු රාජ්‍ය තාන්ත්‍රිකයන් ද ගෘහ සේවිකාවන්ට සැළකීම සම්බන්ධ නීතිමය අරගලවලට සම්බන්ධ වී ඇත.

පුලිට්සර් මධ්‍යස්ථානයේ විමර්ශනයකට අනුව, අවම වශයෙන් රටවල් 18ක සංක්‍රමණික ගෘහ සේවිකාවන් 208 දෙනෙකු විවිධ අන්තර්ජාතික සංවිධානවල රාජ්‍ය තාන්ත්‍රිකයන් සහ සේවකයින් 160 දෙනෙකුට එරෙහිව පැමිණිලි සහ නඩු සිය ගණනක් ගොනු කර ඇත.

රාජ්‍ය තාන්ත්‍රික සුරක්ෂාව හේතුවෙන් විත්තිකරුවන්ට බොහෝ විට වගකීමෙන් වැළකී සිටීමට හැකි වූ බව එම විමර්ශනයෙන් හෙළි වී ඇත.