කැරලිකරුවන්ගේ ප්‍රහාර හමුවේ බලය අතහැර පළාගිය සිරියානු ජනාධිපති බෂාර් අල් අසාද්ගේ බිරිඳ වන අස්මා අල් අසාද් දික්කසාද වීමට ඉල්ලුම් කර ඇතැයි වාර්තා වේ.

ඒ අනුව, ඇය නැවත බ්‍රිතාන්‍යයට යෑමට කැමැත්ත පළකර ඇති බව තුර්කි සහ අරාබි ජනමාධ්‍ය මූලාශ්‍ර උපුටා දක්වමින් ජෙරුසලම් පෝස්ට් පුවත් සේවය වාර්තා කරයි.

බෂාර් අල් අසාද් බලය අතහැර සිය බිරිඳ සහ දරුවන් තිදෙනා සමග රුසියාව වෙත පළාගොස් මේ වනවිට මොස්කව් හි රැඳීසිටියි.

එහෙත් අස්මා අසාද් මොස්කව්හි ඇය ගෙවාදමන ජීවිතය පිළිබඳව සෑහීමකට පත්නොවන බව වාර්තා වේ.

අස්මා රටින් පිටවීමට විශේෂ අවසරයක් ඉල්ලා රුසියානු අධිකරණයකට අයැදුම් කර ඇති අතර, ඇයගේ අයැදුම්පත දැනට රුසියානු බලධාරීන් විසින් සමාලෝචනය කර ඇතැයි පැවැසේ.

සිරියානු මව්පිය දෙපළකට දාව 1975 දී ලන්ඩනයේ උපත ලද අස්මා අල් අසාද් බ්‍රිතාන්‍ය-සිරියානු ද්විත්ව පුරවැසිභාවය දරයි.

ඇය ආයෝජන බැංකුකරණයේ වෘත්තියක් කිරීමට පෙර ලන්ඩනයේ කිංග්ස් කොලේජ් හි පරිගණක විද්‍යාව සහ ප්‍රංශ සාහිත්‍යය පිළිබඳ උපාධි සම්පූර්ණ කර තිබේ.

අස්මා 2000 දෙසැම්බර් මාසයේදී බෂාර් අල්-අසාද් සමඟ විවාහ විය.

මෙම යුවළට හෆීස්, සෙයින් සහ කරීම් නමින් පිරිමි දරුවන් තිදෙනෙක් සිටී.

සිරියානු කැරැල්ල ආරම්භ වූ දා සිට අස්මා තම දරුවන් සමඟ ලන්ඩනයට යෑමට උත්සාහ කර ඇති බව වාර්තා වේ.

කෙසේවෙතත් මේ වනවිට රුසියාවේ මොස්කව්හි සරණාගතභාවය යටතේ පදිංචිව සිටින බෂාර් අල්-අසාද් රුසියානු බලධාරීන් විසින් පනවා ඇති දැඩි සීමාවන්ට මුහුණදෙයි.

රුසියාව ඔහුගේ සරණාගත ඉල්ලීම පිළිගෙන ඇතත්, ඔහුට මොස්කව් නුවරින් පිටවීම හෝ දේශපාලන කටයුතුවල නියැලීම තහනම් වේ.

රුසියානු බලධාරීන් ඔහුගේ වත්කම් අත්හිටුවා ඇති අතර, එම වත්කම් අතරට රත්‍රන් කිලෝග්‍රෑම් 270 ක්, මුදල් ඩොලර් බිලියන 2 ක් සහ මොස්කව්හි දේපළ 18 ක් ඇතුළත් බව වාර්තා වේ.