December 12, 2024
යාපනය ශික්ෂණ රෝහලේ අධ්‍යක්ෂ වෛද්‍ය ටී.සත්‍යමූර්ති පවසන්නේ, පාර්ලිමේන්තු මන්ත්‍රී රාමනාදන් අර්චූනා නැවත රෝහලට පැමිණ එහි මෙහෙයුම්වලට බාධා කළහොත් ඔහු අල්ලා යාපනය පොලිසියට භාරදෙන බවයි.
වෛද්‍ය සත්‍යමූර්ති මේ බව ප්‍රකාශ කළේ, පාර්ලිමේන්තු මන්ත්‍රී අර්ච්චුනා පසුගියදා රෝහලට පැමිණීමෙන් එහි දෛනික කටයුතුවලට බාධා එල්ල වූ බවට යාපනය පොලිසියට කළ පැමිණිල්ලක් සම්බන්ධයෙන් ඊයේ (10) පැවැති ජනමාධ්‍ය හමුවකදීය.
වැඩිදුර තොරතුරු සපයමින් වෛද්‍ය සත්‍යමූර්ති පැහැදිලි කළේ, යාපනය ශික්ෂණ රෝහලට දිනකට රෝගීන් 2,000කට අධික සංඛ්‍යාවක් ප්‍රතිකාර සඳහා පැමිණෙන බවත්, නිසි අධීක්ෂණයක් අත්‍යවශ්‍ය වන බවත්ය.
මන්ත්‍රීවරයා හදිසියේ රෝහලට පැමිණ අනවසරයෙන් තමා හමුවීමට උත්සාහ කළ බවත්, එමඟින් කාර්ය මණ්ඩලයේ රාජකාරියට බාධාකළ බවත් ඔහු ප්‍රකාශ කළේය.
කතාබහ අතරතුරදී මන්ත්‍රීවරයා “සර්” යනුවෙන් ආමන්ත්‍රණය කරන ලෙස අවධාරණය කර තිබේ.
වෛද්‍ය සත්‍යමූර්ති එය ප්‍රතික්‍ෂේප කර ඒ වෙනුවට “ගරු පාර්ලිමේන්තු මන්ත්‍රී” යනුවෙන් ආමන්ත්‍රණය කළ හැකි බව පැවසූ විට මන්ත්‍රීවරයා ඔහුට බැනවැදී ඔහුව ප්‍රශ්න කිරීමට පාර්ලිමේන්තුවට කැඳවා රෝහල් අධ්‍යක්ෂ ධුරයෙන් ඉවත් කිරීමට පියවර ගන්නා බවට තර්ජනය කර තිබේ.
මන්ත්‍රීවරයා මෙලෙස දිගින් දිගටම රෝහල් කටයුතුවලට බාධා කළහොත් රෝහලේ ආරක්ෂක නිලධාරීන් හරහා යාපනය පොලිසියට භාරදීමට පියවර ගන්නා බවද රෝහල් අධ්‍යක්ෂවරයා ප්‍රකාශ කළේය.
