තමාට එල්ලවන චෝදනා සම්බන්ධයෙන් සුදුසු අවස්ථාවේදී කරුණු දක්වන බව කතානායක අශෝක රන්වල ප්‍රකාශ කර ඇත.

ජනමාධ්‍ය විසින් කරන ලද විමසීමකදී ඔහු මේ බව සඳහන් කර තිබේ.

ඊයේ පැවැති කැබිනට් තීරණ දැනුම්දීමේ ජනමාධ්‍ය හමුවේදීද, කැබිනට් ප්‍රකාශක ඇමැති නලින්ද ජයතිස්ස ප්‍රකාශ කළේ ආචාර්ය උපාධිය සම්බන්ධයෙන් එල්ලවන චෝදනාවලට කතානායකවරයා නුදුරු දිනයකදී පිළිතුරු ලබාදෙනු ඇති බවයි.

පාර්ලිමේන්තුවේ කථානායක අශෝක රන්වලට ඇතැයි කියන ආචාර්ය උපාධිය සම්බන්ධයෙන් ආන්දෝලනයක් මතුව ඇති අතර, ඔහු සත්‍ය වශයෙන්ම ආචාර්ය උපාධියක් දරයිද යන්න පිළිබඳව පැහැදිලි කිරීමක් කරන ලෙස විපක්ෂයේ පාර්ශව ඉල්ලා සිටියි.

එක්සත් ජාතික පක්ෂයද ඊයේ ජනමාධ්‍ය හමුවක් පවත්වමින් මේ සම්බන්ධයෙන් ප්‍රශ්න කළේය.

මෙම කාරණය සම්බන්ධයෙන් වර්ධනය වන මහජන සැකය පැහැදිලි කර එය දුරු කරන ලෙස ඔවුහු රජයෙන් ඉල්ලා සිටිති.

මහමැතිවරණයට තරග කිරීමට පෙර ඔහුගේ හැඳින්වීම්වල කථානායකවරයා ‘ආචාර්ය’ යන වචනය සිය නම සමග භාවිතා කළ බව වාර්තා වේ.

ඔහු කථානායකවරයා ලෙස තේරී පත්වීමෙන් පසු ශ්‍රී ලංකා පාර්ලිමේන්තුවේ නිල වෙබ් අඩවියේ ඔහුගේ නම ආචාර්ය අශෝක රන්වල ලෙස සටහන් විය.

කෙසේවෙතත්, කථානායකවරයාගේ ආචාර්ය උපාධියක් නීත්‍යානුකූලව ප්‍රදානය කර තිබේද නැතහොත් පිළිගෙන තිබේද යන්න පිළිබඳව විශ්වවිද්‍යාල ආචාර්යවරුන් සහ අනෙකුත් පුද්ගලයන් සමාජ මාධ්‍ය ඔස්සේ ප්‍රශ්න කිරීමත් සමඟ මෙම ප්‍රශ්නය අවධානයට ලක්විය.

මේ අතරතුර, පාර්ලිමේන්තු වෙබ් අඩවියේ ඔහුගේ නම ඉදිරියේ පැවති ‘අචාර්ය’ කොටස ඉවත් කිරීමත් සමග මෙම සැකය තීව්‍ර වී තිබේ