2009 වසරේ පැනවූ සංචාරක තහනමක් මත කිලිනොච්චියේ පදිංචි, බ්‍රිතාන්‍ය පුරවැසිභාවය ඇති 43 හැවිරිදි පුද්ගලයකු බණ්ඩාරනායක අන්තර්ජාතික ගුවන්තොටුපළේදී අත්අඩංගුවට ගෙන තිබේ.

2009 දී රට හැර ගොස් බ්‍රිතාන්‍ය පුරවැසිභාවය ලබා ඇති මෙම පුද්ගලයා එක්සත් රාජධානියේ සිට ත්‍රස්තවාදී කණ්ඩායමක් සඳහා අරමුදල් රැස් කිරීම සම්බන්ධයෙන් චෝදනා ලැබ සිටී.

ඔහු නැවත ශ්‍රී ලංකාවට පැමිණ කොළඹ සහ වන්නි ප්‍රදේශවල පුද්ගලයන්ට එම මුදල් බෙදා දී ඇති බව වාර්තා විය.

පොලිසිය පවසන පරිදි 2009 වසරේ සැකකරුගේ ක්‍රියාකාරකම් සම්බන්ධයෙන් කොළඹ (උතුර) අපරාධ කොට්ඨාසය විසින් කොළඹ මහේස්ත්‍රාත් අධිකරණයෙන් විදේශ ගමන් තහනම ලබාගෙන ඇත.

සැකකරු ඊයේ (30) කටුනායක ගුවන් තොටුපළට පැමිණ ඇති අතර ගුවන් තොටුපළ පොලිසියට දැනුම්දීමෙන් අනතුරුව ආගමන විගමන නිලධාරීන් විසින් සැකකරු රඳවාගෙන තිබේ.

ගුවන්තොටුපළ පොලිසිය සහ කොළඹ (උතුර) අපරාධ කොට්ඨාසය ඔහු සම්බන්ධ වැඩිදුර පරීක්ෂණ පවත්වයි.